2 Желтоқсан 20:36

Қанат Бозымбаев: Бағаның өсуіне жол берілмеуін қатаң тапсырамын!

Фото:

Бүгін Алматы облысының әкімі Қанат Бозымбаев жылыту маусымының өту барысы туралы кеңес өткізді.

Талдықорған, NEGE. Селекторлық жиынға жылыту маусымына уақытылы дайындық жүргізу және оны өткізу жөніндегі облыстық штаб мүшелері мен бюджеттік бағдарлама әкімшілері, аудан, қала әкімдері, тиісті коммуналдық мекемелердің өкілдері қатысты. Жиында облыс әкімі тиісті көлемде қатты отынның жеткізілмей отырғанын сынға алып, нақты шаралар қабылдауды тапсырды.

– Жылыту маусымы басталғалы облысымызға қажетті қатты отын көлемі әлі толық жеткізілген жоқ. «Қаражыра» кен орнынан әкелінген көмір көлемі 300 мың тоннаға жуық немесе 54% ғана құрап отыр, бұл өз кезегінде халықтың көптеген наразылығын тудыруда. Осыған байланысты қазіргі жиында жылыту маусымының өту барысын қарастырамыз, – деді Қ.Бозымбаев.

Көмір бағасының қанша екенін сұраған Қанат Алдабергенұлы басқарма басшысының «Көмір бағасы 14-16 мың теңге көлемінде» деген жауабына көңілі толған жоқ.

– Мендегі мәлімет басқа. Мен көмірдің көтерме бағасын емес, тұрғындарға сатылатын бағасын сұрап отырмын. Халық қазір көмірді 23-30 мың теңге арасындағы сомаға сатып алып отыр. Неге бұлай? Ең алдымен көмір жетіспеушілігін болдырмау керек. Екіншіден, бағаның көтерілуіне жол бермеу керек. Егер көмір жетпей жатса, бағаны қалай ұстап тұра аласыздар? Жұмыстарыңыз нашар, – деді Қ.Бозымбаев.

Жиын барысында облыс әкімі Қанат Бозымбаев қысқы отынмен жеткілікті көлемде қамту, темір жол арқылы тасымалдау мәселелері бойынша тиісті акционерлік қоғамдардың басшыларымен сөйлескенін, олардың барлығы облысқа қажетті қолдау көрсететінін айтты.

– Халықты көмірмен қамту шаралары уақытылы қабылданып, бағалардың өсуіне жол берілмеуін қатаң тапсырамын. Халықтың әлеуметтік жағынан қорғалатын осал топтарына көмірді коммуналдық автокөліктермен жеткізіп беру ұйымдастырылсын. Әр аудан, қалада көмір тасымалдаумен кімдер айналысады, қандай көлікпен тасиды, бәрін біліп отырсыздар. Сондықтан оларды шақырып, тиісті калькуляция жасап, келісім негізінде шекті бағаны қою керек. Оған көнбей ме, көмір тұйықтарына жібермеңіздер. Бағаны бақылаңыздар. Көмір жетіспеушілігінен халық зардап шекпеуі керек! – деді Қанат Бозымбаев.

Тегтер: