Қазақстандағы ең кедей өңір белгілі болды: жағдай нашарлай түскен
Қаржы саласындағы сарапшылардың мәлімдеуінше, өткен жылы Қазақстандағы халықтың кедей бөлігінің жағдайы 2024 жылғы деңгейден айтарлықтай өзгере қоймаған. Ал өңірлерде жағдай нашарлаған.
Астана, NEGE. Finprom желілік басылымы келтірген мәлімет бойынша, 2025 жылы кедейлік тереңдігі (халықтың кедей бөлігінің табысы күнкөріс минимумынан орта есеппен қаншалықты төмен екенін көрсетеді) 0,8% болса, кедейлік өткірлігі (халықтың ең кедей бөлігі ішіндегі теңсіздікті көрсетеді) 0,2%-ға тең болған. Ал халық табысының жалпы бөлінісіндегі теңсіздік деңгейін көрсететін Джини коэффициенті 0,296-дан 0,291-ге дейін түскен.
Ең күрделі жағдай Ұлытау облысында тіркелген. Мұнда кедейлік тереңдігі – 1,6%, ал кедейлік өткірлігі 0,7%-ды көрсеткен. Бір жыл ішінде екі мән де өскен. Джини коэффициенті мен қорлар коэффициенті аздап төмендегеніне қарамастан, өңір табыс теңсіздігі жоғары аймақтардың қатарында қалып отыр.
Кедейлік тереңдігі бойынша екінші орында Маңғыстау облысы тұр. Бұл көрсеткіш 2024 жылмен салыстырғанда, 1,1%-дан 1,3%-ға өскен, ал кедейлік өткірлігі екі есе артып, 0,4%-ға жетті. Соған қарамастан, облыстағы табыс теңсіздігі ел бойынша төмен деңгейді көрсеткен . Бұл өңірде табыстар салыстырмалы түрде біркелкі бөлінгенімен, тұрғындардың бір бөлігінің табысы әлі де төмен екенін көрсетеді.
Абай облысында жағдай сәл жақсарған. Кедейлік тереңдігі 1,6%-дан 1,2%-ға, ал өткірлігі 0,5%-дан 0,3%-ға түскен. Алайда өңірдегі табыс теңсіздігі аздап өскен.
Жетісу және Түркістан облыстарында кедейлік тереңдігі 1,1% деңгейінде сақталды. Түркістан облысында кедейліктің өткірлігі де, теңсіздік деңгейі де төмендеген.
Сарапшылар Павлодар және Қарағанды облыстарын да ерекше атап өтті. Павлодар облысында теңсіздік көрсеткіштері күрт өскен: Джини коэффициенті 0,331-ге, ал қорлар коэффициенті 7,58 есеге жеткен. Қарағанды облысында кедейлік тереңдігінен бастап табыс жіктелуіне дейінгі барлық көрсеткіш нашарлаған.
Мегаполистер арасында Алматы мен Астанада теңсіздік деңгейі төмендегенімен, елордада кедейлік тереңдігі аздап өсті. Шымкентте жағдай анағұрлым жақсарған: кедейлік тереңдігі 1,6%-дан 1,1%-ға, ал өткірлігі 0,6%-дан 0,4%-ға дейін қысқарды. Соған қарамастан, қала әлі де кедейлік деңгейі жоғары аумақтардың қатарында қалып отыр.
Кедейлік тереңдігінің ең төмен көрсеткіштері Атырау және Жамбыл облыстарында тіркелді – 0,3%-дан.
Сарапшылар келген қорытынды бойынша, өңірлер арасындағы айырмашылық ел ішіндегі жағдайдың әлі де біркелкі емес екенін көрсетеді.
