Енді «автодозвонның» орнына SMS-хабарлама жіберіледі: ережеге өзгеріс енгізілмек

Астана, NEGE. Депутат автоматты қайта қоңырау шалу мәселесін Мәжілістің жалпы отырысында Жасанды интеллект және цифрлық даму министрінің алдында көтеріп, заңға түзету енгізуге бастамашы болған.

«Нәтиже бар. Қазіргі уақытта Байланыс қызметтерін көрсету қағидаларына тиісті өзгерістер енгізілуде. Жаңа ережеге сай, абонентті қабылданбаған қоңыраулар туралы SMS арқылы ғана іске асырылады», – деп, Асхат Аймағамбетов Telegram-дағы арнасында министрлік өкілінің жауабын қоса жариялады.

Жасанды интеллект және цифрлық даму вице-министрі Досжан Мұсалиев қол қойған құжатта бұйрық жобасы Әділет министрлігінің ескертулері мен ұсыныстарына сәйкес пысықталып жатқаны айтылған.

Бұған қоса депутат заң жобасы шеңберінде рұқсат етілмеген трафикті генерациялауға тыйым салу бойынша да арнайы түзетулер қарастырылып жатқанын жеткізді.

Асхат Аймағамбетов халықты мазалайтын, спамға айналған заңсыз қоңырауларға құқықтық тұрғыдан нақты тосқауыл қою маңызды екенін айтады.