Қызылорда облысында республикалық бюджет есебінен 6973,5 мың доза ветеринариялық препарат бөлінді
Басқармаға қарасты аудандық (қалалық) ветеринариялық ұйымдарда (8 ветстанция, 139 ветеринариялық пункт) барлығы 746 қызметкер жұмыс істейді. Осы мамандар барлық ветеринариялық іс-шараларды атқарады.
Қызылорда, NEGE. 2023 жылы өңірде эпизоотиялық тұрақтылықты сақтау мақсатында аса қауіпті 14 түрлі (құтыру, аусыл, лептоспироз, листериоз, пастереллез, сібір жарасы, нодулярлы дерматит, эхинококкоз, күл, қарасан, оба, туберкулез, вирусты диарея, құс тұмауы) жұқпалы ауруларға республикалық бюджет есебінен бөлінген 6973,5 мың доза ветеринариялық препараттар толық тасымалданып, аудандарға таратылды.
Вакцина көлемі өткен жылмен салыстырғанда 1 млн. дозаға немесе 17,1%-ға артты (2022 жылы 5955,8 мың доза). Жылдық жоспар 100% орындалды.
2024 жылға аса қауіпті 14 түрлі жұқпалы ауруларға 7542,0 мың доза ветеринариялық препараттарға ұсыныс берілді.
Жергілікті жерлерде аса қауіпті жұқпалы ауруларға қарсы алдын ала егу, диагностикалалық тексеру жұмыстарының жылда тұрақты, сапалы, уақытылы жүргізілуінің нәтижесінде 2017 жылы (Париж қаласында өткен Халықаралық эпизоотиялық бюросының Бас Ассамблеясының 85-ші сессиясында 183 мүше ел дауыс беру арқылы) облысымызға берілген вакцина қолданылатын аусыл бойынша таза аймақ мәртебесін Дүниежүзілік жануарлар денсаулығы ұйымы 2023 жылдың наурыз айында қайта растады.
Қазіргі күні, облыс көлемінде аса қауіпті аурулар тіркелмей эпизоотиялық жағдай тұрақты.
Ауыл шаруашылығы жануарларын бірдейлендіру жұмыстары тұрақты түрде жүргізіліп, ақпараттық жүйеге енгізіліп отыр.
2023 жылдың 1 желтоқсанына ақпараттық жүйеде 1668,5 мың бас (447,4 мың бас МІҚ, 903,9 мың бас уақ мал, 251,2 мың бас жылқы, 66,0 мың бас түйе) ауыл шаруашылығы жануарлары тіркелді. Өткен жылдың осы кезеңімен салыстырғанда жалпы мал саны 6,9%-ға (МІҚ 7,1, уақ мал 5,8, жылқы 11,6, түйе 5) өсіп отыр.
Осы жылы барлығы 452,4 мың бас (110,8 мың бас МІҚ, 286,8 мың бас уақ мал, 9,2, мың бас түйе, 45,1 мың бас жылқы, 0,5 шошқа) ауыл шаруашылығы жануарлары бірдейлендіріліп, ақпараттық жүйеге енгізілді.
2024 жылы 498,0 мың дана құлақ жапсырмаларына тапсырыс берілді.
Мемлекет басшысының 2021 жылғы халыққа Жолдауында ветеринария саласын реформалау жөнінде нақты шаралар қабылдау қажеттігін атап өтті.
Президент тапсырмасына сәйкес 2022 жылы облыс бойынша эпизоотияға қарсы
іс-шаралар жүргізуге бөлінген 1140,0 млн теңге қаржыға аймақ басшысының қолдауымен қосымша 723,8 млн. теңге бөлініп, ветеринар мамандардың айлық жалақылары 40%-ға көтерілді.
Биыл «Биологиялық қауіпсіздігі туралы» ҚР Заңына сәйкес облыс көлемінде ветеринариялық ұйымдарда І және ІІ топтардағы патогенді биологиялық агенттермен жұмыс істеуді жүзеге асыратын ветеринар мамандардың лауазымдық айлық жалақыларына жүргізген жұмыстарының зияндылығына (за вредность) қаржы төлену керектігі дәлелденіп, ҚР Ауыл шаруашылығы министрлігіне ұсыныс берілді. Осыған байланысты алғаш рет республикалық бюджетен 2023 жылға 635 ветеринар маманға зияндылығы үшін республикалық бюджеттен 455,3 млн. теңге бөлініп, лауазымдық айлық жалақыларына 50% үстем ақы қосылып көтерілді.
Өз кезегінде ветеринар мамандардың жалақы аздығынан басқа жұмысқа ауысуы тоқтап, кадрлық тұрақтылық сақталды. Ветеринариялық ұйымдардың базасын жаңарту мақсатында 2021 жылдан бері облыстық бюджеттен қаржы бөлініп келеді. 2023 жылы 30 дана арнайы автокөлік, 163 дана термочемодан, 163 компьютер жиынтығы сатып алынды.
ҚР АШМ тарапынан бекітілген жоспарға сәйкес, ҚР Үкіметі және Дүниежүзілік жануарлар денсаулығы ұйымы арасындағы келісімді іске асыру мақсатында, жануарлардың аса қауіпті ауруларының алдын-алу бойынша 2022-2023 жылдары тұрақты негізде барлық облыстарда симулятивті оқу жаттығулар өткізілуде.
Осыған байланысты, облыс бойынша 12 мамыр күні Белкөл кентіне қарасты «KZO-Ет» шаруа қожалығында сібір жарасы ауруы бойынша республикалық симуляциялық оқу-жаттығу өткізілді.
Оқу-жаттығу барысында сібір жарасы ауруына күдікті жағдай тіркелген уақытта алгоритмге сәйкес тиісті мекемелерге хабарламалар беру, өлекседен патологиялық үлгілер алу, оларды ветеринариялық зертханаға жеткізу, карантин іс-шараларын белгілеу, сауықтыру жұмыстарын жүргізу әдістері көрсетілді.
