Қазақстанда құрбан шалу рәсімін қашықтан өткізуге арналған сайт іске қосылды
Қазақстан мұсылмандары діни басқармасы Құрбан шалу рәсімін қашықтан өткізуге арналған qurban.muftyat.kz сайтын іске қосты.
Астана, NEGE. Биыл да құрбан шалу офлайн және онлайн форматта жүргізілмек. Діни басқарма өкілдерінің түсіндіруінше, бұл шара үлкен қалаларда тұратын жамағатқа құрбан шалу ыңғайлы болу үшін іске асырылып отыр. Онлайн түрде құрбан шалам деушілер сайт арқылы құрбандық малын таңдап, Kaspi QR арқылы қажетті қаражатты аудара алады.
«Қой мен ешкіні бір адам, ал ірі қара мен түйе малын бір немесе жеті адам бірігіп шалуына болады. Тапсырыс сәтті қабылданса, ұялы телефоныңызға SMS-хабарлама келеді. Құрбандық шалынған соң оның фото және бейне есебі тапсырыс беруші көрсеткен нөмірге жіберіледі», – делінген ҚМДБ сайтында жарияланған хабарламада.
Мүфтият барша қазақ елін Құрбан айт күндері өтетін қайырымдылық акциясына үлес қосуға шақырады.
Айта кетейік, ҚМДБ күнтізбесіне сәйкес биыл Құрбан айт 27-29 мамыр аралығында өтеді. Құрбан айттың алғашқы күні – 27 мамыр Қазақстанда демалыс күні болып белгіленген.
