Ресейше ұрын келу. «ҚазМұнайГаз» НЕГЕ «Татнефтьпен» ауыз жаласа бастады?
«ҚазМұнайГаз» жыл сайын қарызға батуда. Ол 2024 жылдың шоғырланған қаржылық есебінен белгілі болды. Ұлттық компания қарызы 4 триллион теңгеге дейін жетті. Бұл дегеніңіз – 8 миллиард доллар немесе компания активінің 21 пайызы!
Демек, «ҚазМұнайГаз» барлық тапқан-таянғанын қарызды төлеуге жіберіп отырса, оған қарыздан құтылуға кемі 4 жыл қажет болады. Себебі, 2024 жылы компанияның таза пайдасы 1,1 триллион теңге болды.
«ҚазМұнайГаздың» өзінің иелігіндегі мұнай запастарын Ресей компанияларына бере бастауы алаңдаушылық туғызып отыр. Ұлттық компания 2024 жылдың басында Атыраудағы «Қаратон» мұнай кенішінің 50% үлесін «Татнефть» акционерлік қоғамына 18,2 миллион долларға сатып, кенішті бақылау құқығын жоғалтып алған болатын.
«Татнефтьпен» іс бітпейді. 2023 жылы «ҚазМұнайГаз» Каспий теңізіндегі «Каламқас-теңіз», «Хазар» және «Ауэзов» мұнай кеніштеріндегі 50 пайыз үлесті ресейлік «Лукойлға» 200 миллион долларға сатып жіберген.
Қолда барын сатып жатса да, қарызы көбейген үстіне көбейіп барады. 4 триллион теңге қарыздың 3 триллион теңгесін доллармен алған. Бұл – шамамен 6 миллиард доллар.
«ҚазМұнайГаздың» таза табысының үштен бір бөлігін оның «Теңізшевройлдағы» 20% үлесі алып келді. Ал Румыния мен Молдовадағы активтері бәлендей табыс әкелмейді.
-
-
Тақырыпқа орай: «ҚазМұнайГаз» басшысының тоғыз орынбасары не істейді?
-
Тіпті Румыния біздің ұлттық компанияны өз бюджетін асырайтын ыңғайлы донор қылып алған. Әр қадамын аңдып, сәл кіріске шыға бастаса, үстінен қосымша салық, айыппұл ойлап тауып, ақшасын қағып алып отыр. Ал «ҚМГ» мәселені шешудің орнына тек орынбасар санын көбейтуді біледі. Қазір ондағы басшының тоғыз орынбасары бар. Мұнша орынбасардың НЕГЕ керек болғаны белгісіз.
Румынияның халқын асырап отырған, Ресейге барлық кеніштерін бере салуға дайын, ақкөңіл ұлттық компания қарызға батпағанда не істейді? Тек ертең осы қарыз үшін мемлекет, яғни халық жауап беретіні өкінішті...
