Отандық ауыл шаруашылығы машина жасау кәсіпорындарын қолдау мақсатында субсидиялаудың жаңа тетігі қабылданды
Мемлекет басшысы Қасым-Жомарт Тоқаевтың 2023 жылғы 1 қыркүйектегі «Әділетті Қазақстанның экономикалық бағдары» атты Қазақстан халқына Жолдауында ауыл шаруашылығы техникасының 80 пайызының тозығы жеткенін айтқан болатын.
Алматы, NEGE. «Машина-трактор паркінің әбден ескіріп, тозуы – күрделі мәселеге айналды. Қазір ауыл шаруашылығы техникасының 80 пайызы тозып тұр. Сондықтан жыл сайын оның 8-10 пайызын жаңартып отыру қажет. Бұл ретте еліміздегі техника өндірушілер мен шаруалардың да мүддесін ескерген абзал», - деді Президент.
Мемлекет басшысының осы тапсырмасын орындау шеңберінде Министрлік мынадай шараларды іске асырады.
- Шаруалар сатып алған ауыл шаруашылығы техникаларын инвестициялық субсидиялау: мұнда техника құнының 25-30%-ы мемлекет бюджеті есебінен өтеледі.
- Отандық ауыл шаруашылығы машина жасау кәсіпорындарын қолдау мақсатында биыл субсидиялаудың жаңа тетігі қабылданды:
- Отандық өндіріс техникасы құнының 30%-ы субсидияланады;
- Қазақстанда өндірісі жолға қойылған техниканың импорттық аналогтарын субсидиялау мүмкіндіктері алынып тасталды;
- Қазақстанда өндірісі жоқ импорттық техниканың түрлері бойынша (қант қызылшасын, мақтаны, картопты және жеміс-көкөніс дақылдарын өндіру және жинау бойынша мамандандырылған техника) субсидия нормативі 25%.
Жаңа тәсіл қосымша бюджет қаражатына иек артпай-ақ отандық ауыл шаруашылығы техникасын субсидиялау көлемін екі еседен астам ұлғайтуға мүмкіндік береді.
- Отандық өндірістің ауыл шаруашылығы техникасының жеңілдікті лизингі бағдарламаларын қаржыландыру:
- 2023 жылы «ҚазАгроҚаржы» АҚ жарғылық капиталын 20 млрд.теңгеге ұлғайтуға жем-шөп дайындау техникасы мен суарудың мобильді жүйелерін қаржыландыру үшін бюджеттік инвестициялар бөлу жөнінде жұмыс жүргізілді.
- Жылдық 6% жеңілдік мөлшерлемесі бойынша 3,5 мың бірлік жем-шөп дайындау техникасы мен жабдықтары лизингке берілді.
1,5 мыңнан астам ауыл шаруашылығы тауарын өндірушілер (7-10 жыл кезеңіне 6% ставка бойынша бастапқы жарнасыз) жеңілдікті лизинг бағдарламасы бойынша 1600 трактор мен комбайн сатып алды. Бұл машина-трактор паркін жаңарту деңгейін едәуір арттырды.
