Б.Тілеухан мен М.Тазабекке қатысты іс қозғалуы мүмкін бе? Бас прокурор жауап берді
, Сыбайлас жемқорлыққа қарсы іс-қимыл агенттігінің төрағасы және Қорғаныс министрі секілді құзырлы орган басшылары келіп, Қаңтар көтерілісіне қатысты түсініктеме берді.
Алайда «Кім мемлекеттік төңкеріс ұйымдастырмақ болды? Қаза тапқандардың аты-жөні қашан жарияланады? Сатыбалдыңын сыбайластары ұсталуы мүмкін бе?» деген ең маңызды сұрақтар жауапсыз қалды.
-
Тақырыпқа орай: Сыбайлас жемқорлыққа қарсы қызмет: Қайрат Сатыбалдыұлы ұсталды
Жиыннан соң Nege.kz тілшісі осы және өзге де сұрақтарды Бас прокурор Берік Асыловқа қойған еді. Алайда Берік Ноғайұлы журналистердің сұрақтарына толымды жауап бермеді.
– ҰҚК төрағасы және оның үш орынбасары ұсталды, алайда бірінші орынбасар болған Самат Әбіш неге ұсталмады?
С.Әбіш.
– Қазіргі таңда оған қатысты ешқандай дәлел жоқ.
– Қайрат Сатыбалдының қаңтар бүлігіне қатысы бар ма?
– Әзірге ешқандай қатысы жоқ.
– Бұрынғы президенттің отбасы мүшелерінің қатысы болуы мүмкін бе?
– Әлі қарастырып жатырмыз. Жауап бере алмаймын.
– Бұл қашан айтылуы мүмкін?
– Қаңтар оқиғасына отбасының қатысы бар екенін қазір айта алмаймыз.
– Билікті басып алғысы келгендер қалталы адамдар екені белгілі ғой. Кімдер болуы мүмкін?
– Бұл сұрақтың бәрі қарастырылып жатыр. Кім ұйымдастырғанын айтуға әлі ерте.
– «Радикалды діни ұйым мүшелерін арнайы дайындаған» деген рас па?
– Қазір ондай мәселені толық айта алмаймын. Ондай мәселе туындаған. Бірақ қарастырып жатырмыз. Турасын кейін айтамын.
– Салафизмге тыйым салына ма? Мәселен, осы ағымға қатысы бар делінетін Бекболат Тілеухан, Мұхамеджан Тазабек сияқты азаматтарға қандай да бір шара қолданылуы мүмкін бе?
Қ.Сатыбалды мен Б.Тілеухан
Қ.Сатыбалды және М.Тазабек
– Осы айтып отырған сұрақтар қаңтар оқиғасына байланысты туындап тұрған жоқ.
– Қаңтар оқиғасына теріс діни ағымдардың қатысы бар екені айтылды ғой...
– Діни өкілдердің әсері бар. Бірақ сіз айтып отырған адамдар қарастырылып отырған жоқ.
– Азаматтарды азаптады делінген 334 полицияның мәселесі қалай болып жатыр? 243 іс бойынша 9 адам ұсталды дедіңіз...
– Қазір олардың бәрі зерттеліп жатыр.
– Азамат Батырбаевты азаптаған, арқасына үтік басқан адамдар ұсталды ма?
А.Батырбаев.
– Ұсталды. Тура сол азаматтың ісі бойынша Алматы облысында бір полция қызметкері ұсталды.
– Қаңтар оқиғасына қатысып, қаза тапқан азаматтарға эксгумация жасалды. Одан қандайда бір пайда болды ма?
– Әрине пайдасы бар. Эксгумация не үшін жасалып отыр? Ол адамдардың неден жарақат алғанын, қандай да бір іске дәлел болуы үшін эксгумация алынады. Қателеспесем, 37 адамға жасалған болуы керек
– Семейде тергеліп жатқан кезде үш күдікті азамат қаза болды. Оларды өліміне себепкер болған полиция қызметкерлері ұсталды ма?
– Қазір іс қозғалып, тергеліп жатыр. Ұсталған-ұсталмағанын нақты айта алмаймын.
Қазір сіздердің мына әрекеттеріңіз (журналистердің өзін қыспаққа алуын айтады – ред.) дұрыс емес. Пресс-конференция жасаймын, сұрақтарыңызды баппен бөліп, қарастырамыз.
– Нақты қай күні пресс-конферения өткізесіз?
– Сұрақтарыңыздың бәрін беріңіз. Біз оны қарастырайық. Оның бәрі сұраққа, жұмысқа байланысты.
P.S. Журналистерден азарда-безер болған Берік Асылов сұрақтарға тұщымды жауап бермеді. Көмекшілері Бас прокурорды қызғыштай қорып, журналистерге күш қолдануға тырысты.
