Ясауи университетінде «Адам құқықтары жолында – дұрыс жолды таңда» атты семинар өтті

Түркістан, NEGE. Жиынды Түркістан облысы денсаулық сақтау басқармасының «Облыстық АИТВ – инфекциясының алдын алу орталығы» ұйымдастырды. Мамандар нашақорлық пен маскүнемдіктің адам өміріне қауіпін насихаттау және СПИД-тің алдын алу бойынша түсіндірме жұмыстарын жүргізді.

Іс-шараға Түркістан облысы денсаулық сақтау басқармасының «Облыстық АИТВ – инфекциясының алдын алу орталығы» МКҚК-ның басшылары мен мамандары, дәрігер-наркологтар және 1-2 курс студенттері қатысты.

Семинарда сөз бастаған Облыстық АИТВ – инфекциясының алдын алу орталығының басшы орынбасары Дәурен Рыскелдиев:

«Бүгінгі іс-шара – жыл сайынғы үрдіске айналған, 1желтоқсан – Дүниежүзілік ЖИТС-ке қарсы күрес күніне орай ұйымдастырылды. Басты мақсатымыз – АИТВ инфекциясының алдын алу. Жастарға түсіндірме жұмыстарын жүргізіп, бағыт беру. Бұл инфекцияның алдын алуға шақырамыз! Әр адамның денсаулығы – өз қолында. Жастарды, сіздердің жақындарыңызды жылына бір рет инфекцияға қарсы тексеруден өтуге шақырамыз!», - деді.

Келесі кезекте, мамандар қоғам дертіне айналған нашақорлық пен маскүнемдік дерттері туралы тың ақпараттар берді. Адамның өз денсаулығына деген жауапкершілігі жөнінде ақыл-кеңестерін айтты. Аталған дерттерге қарсы күрес пен емдеу жолдары айтылды.

Сондай-ақ, студенттер мен ерікті азаматтар АИТВ инфекциясына тексерілу үшін тегін экспресс-тестілеу тапсырды.

Айта кетейік, жедел тест нәтижесін 20 минуттан кейін алуға болады.

Жиын соңында қатысушылар өздерін толғандырған сауалдарына жауап алды.

Айта кетейік, АИТВ-инфекциясы – адамның иммун тапшылығы вирусын жұқтыру нәтижесінде пайда болатын баяу үдемелі дамитын жұқпалы ауру. Ауру адамның иммундық жүйесіне әсер етеді, нәтижесінде ағза әртүрлі инфекцияларға (бұрын ауруды тудыруы мүмкін емес (оппортунистік инфекциялар – бактериялық пневмония, адам папилломавирусы, кандидоз, герпес зостері және т.б.)) және қатерлі ісіктерге өте сезімтал болады, нәтижесінде науқасты өлімге әкеледі. ЖИТС (жүре пайда болған иммундық тапшылық синдромы) – аурудың соңғы сатысы.

Инфекция көзі – вирус жұқтырған адам, вирус тасымалдаушы немесе ЖИТС-пен ауыратын адам. Вирус тасымалдаушылар көбінесе жұқтырғанын білмей, өздерін сау деп санайды, өйткені оларда бірнеше жыл бойы ауру белгілері болмауы мүмкін.

Инфекцияның берілу жолдары:

– жыныстық қатынас кезінде (көптеген жыныстық қатынастары бар, әсіресе кездейсоқ немесе бейтаныс серіктестермен);

– парентеральді (қан арқылы) берілу: ластанған қанды құю кезінде немесе қанмен ластанған құралдар арқылы, түрлі инъекциялар жүргізген кезде (әсіресе нашақорлар арасында көк тамырға есіркіні енгізген кезде).

– жүктілік және босану кезінде вирустың анадан балаға берілуі мүмкін.