Ядролық физика институтының қызметкерлері үш айдан бері жалақы алмаған
Институт қызметкерлеріне еңбек демалысына шыққанда төленетін демалыс ақысы да әлі берілмеген.
Астана, NEGE. Threads желісінде Ядролық физика институты қызметкерлерінің жанайқайын жеткізген жазба жарияланды. Anorakaio аккаунтымен тіркелген желі қолданушысының жазуынша, институт қызметкерлері үш айдан бері жалақы алмаған.
«Ғылым ордасы қызметкерлерін күнкөріс қаражатынсыз қалдырды. Мамыр және маусым айларына тиесілі берешек жалақыны шілде айының соңына дейін өтейміз деп уәде берген, алайда бұл сөзге сенім жоқ», – деп жазады ол.
Ядролық физика институты өкілдері қазіргі уақытта қаражат түсуін күтіп отырғанын, 20 шілдеден бастап қызметкерлерге еңбекақы кезең-кезеңімен төлене бастайтынын айтып жауап берді.
«Мамыр айының жалақысының 40%-ын және маусым айының жалақысының 85%-ын 20–24 шілде аралығында төлеу жоспарланған», – делінген хабарламада.
Ал шілде айының жалақысы заңнамада белгіленген мерзімде, яғни 10 тамызға дейін төленетіні айтылған.
