16 жастағы қазақстандық полиглот Оман елшісінің аудармашысы болды
16 жастағы Бахтияр Сәдібеков Иранның Қазақстандағы елшілігінде өткен ресми шарада Оман елшісінің сөзін аударды.
Астана, NEGE. Дипломатиялық ортада шеберлігін шыңдап жүрген жас полиглот Иран Ислам Республикасының құрылғанына 47 жылдығына арналған ресми шараға арнайы шақыртылған. Ол әлеуметтік желідегі парақшасында Оман елшісі Мұхаммед әл-Бахранимен түскен видеосын жариялап, тіл білу мол мүмкіндік ашатын дағды екенін айтады.
«Мұндай оқиғалар тілдердің жай ғана дағды емес, халықаралық ортаға, дипломатияға және әртүрлі елдердің елшілері, консулдары және өзге де өкілдерімен жұмыс істеуге жол ашатын нақты құрал екенін көрсетеді.
Сондықтан бүгін білім мен тіл үйренуге салынған инвестиция – болашағыңа салынған инвестиция», – деп жазады Бахтияр.
Айта кетейік, жас полиглот бұған дейін де бірнеше халықаралық шараға аудармашы ретінде қатысқан.
Бахтияр араб тілімен қатар ағылшын, француз, испан, қытай, түрік, парсы тілдерін меңгерген. Ол бүгінде әлеуметтік желіде тіл үйренуді белсенді түрде насихаттап жүр. Тіпті тіл үйретіп тапқан қаржысына анасына Астанадан екі бөлмелі пәтер сыйлап үлгеріпті.
