Әзілкеш Қайрат Әділгерей Құрманғазының ұрпақтарынан кешірім сұрады
Әлеуметтік желіде актер әрі әзілкеш Қайрат Әділгерейдің қазақтың ұлы күйшісі Құрманғазы Сағырбайұлы жайлы айтқан пікірі қоғамда үлкен резонанс тудырды.
Алматы, NEGE. Көпшілік оның сөзін орынсыз деп бағалап, наразылық білдірді.
Қоғамның сынынан кейін өнер иесі көпшілікке арнайы үндеу жасап, өз ойын нақтылап өтті. Ол Құрманғазы бабамыздың рухын қорлау ниеті болмағанын айтты.
Актердің айтуынша, жақын күндері күйші жерленген Астрахань облысына барып, оның рухына құран бағыштап, ұрпақтарынан кешірім сұрамақ.
«Қазақ тарихының тұлғасы, күй атасы Құрманғазы бабамыз туралы айтқан сөздеріме түсініктеме беруді жөн көрдім. Бұйырса, жақын арада бабамыздың жатқан жеріне барып, құран бағыштап, ұрпақтарынан кешірім сұраймын. Бабамыздың аруағын қорлау ниетім болған жоқ», – деді Қайрат Әділгерей.
Айта кетейік, бұған дейін тарихи тұлға, күйші Құрманғазының ұрпақтары Қайрат Әділгерейді сотқа беретіндерін мәлімдеген еді. Себебі әзілкеш бір сұхбатында Құрманғазыны «қарақшыға» теңеген еді.
