Қазақ ұлттық университетінде Н.Иманғалиұлы атындағы оқу-шығармашылық зертхана ашылды

Алматы, NEGE. Арнайы аудиторияның ашылу салтанатына Ақпарат және қоғамдық даму министрі Аида Балаева, Әл-Фараби атындағы ҚазҰУ ректоры Жансейіт Түймебаев, Нұрғали Иманғалиұлының отбасы мүшелері, сондай-ақ мемлекеттік және коммерциялық БАҚ өкілдері қатысты.  

«Бүгін Нұртілеу Иманғалиұлының құрметіне арналған кезекті іс-шараның куәсі болып отырмыз. Бұл – зиялы азаматқа деген қоғамның үлкен құрметін көрсетеді», - деді А.Балаева.  

Айта кетейік, бұған дейін Н.Иманғалиұлы атындағы журналистика факультетінің студенттеріне арналған арнайы білім беру степендиясы тағайындалса, Парламент Сенаты «Аманат» байқауы аясында арнайы премия тағайындады, сондай-ақ телевизия ардагерлері арасында волейболдан турнир ұйымдастырылды.  Н.Иманғалиұлы туралы

Министр А.Балаева өз сөзінде: «Қазақ телевизиясы саласында өзіндік мектеп қалыптастыра білді. Өзіне қарап бой түзеген жас журналистер қатарынан қаншама буын шәкірт тәрбиеледі. Өмірінің соңғы айларына дейін, ауру жанына батып жүрсе де, журналистикадан кеткен жоқ. Түрлі хабарларға шығып, ой-пікірін білдіріп жүрді. Өз кәсібіне деген адалдық, журналистикаға деген құрмет осылай көрінеді», — деді.  

Әріптестері мен жақындары Нұртілеу Иманғалиұлын жылы естеліктермен еске алып, оның бүкіл жасампаз өмірін тележурналистердің дамуына арнағанын, жастар редакциясынан «Қазақстан «РТРК» АҚ Басқарма төрағасына дейінгі үлкен еңбек жолын жүріп өткенін атап өтті.  Еңбек жолында бірқатар үкіметтік наградаларды, «Қазақстанның еңбек сіңірген қайраткері» құрметті атағына ие болып, «Парасат» орденімен, «Ерен еңбегі үшін» медалімен, Қазақстан Республикасы Президентінің Құрмет грамотасымен марапатталған болатын.