Кең жолақты сапалы интернет ырсайлықтардың ырысын тасытты
Біз бұған дейін «Қазақтелекомның» интернеті Алматы облысының шекаралық ауданы тұрғындарының мүмкіндігін кеңейткенін, Жамбыл облысы ауыл кәсіпкерлерінің жұмысын жандандырғанын жазғанбыз. Ал бүгін Қостанай облысы, Жітіқара ауданы, Ырсай ауылының ырысын қалай тасытқанын сөз етеміз.
Онлайн-оқу, телемедицина, eGov, zoom, Smart TV деген заманауи қызмет түрлері «Қазақтелекомның» жоғары жылдамдықты интернеті келгелі ауыл тұрғындары үшін өмірінің бір бөлігіне айнала бастады. Мұны ырсайлықтар да растайды. Кең жолақты интернет ауылда жаңа мүмкіндіктерге жол ашып, «интернетке дейінгі дәуірді» жұрт ұмытты.
Ырсай ауылының тұрғыны, шаруа қожалығының иесі Құдайберген Бисімбаев 30 жылдан бері ауыл шаруашылығымен айналысып келеді. Бұған дейін кәсіпкер салық есебін өткізу үшін салпақтап аудан орталығына баратын айтады. Қазір ол үйінде кеңсе жасап алып, шаруа қожалығының барлық құжаттарын онлайн-форматта жүргізіп отыр.
«Ауыл шаруашылығы көп күш-жігер мен білімді қажет етеді. Интернеттің көмегімен құжаттарымды жүргізіп қана қоймай, өзімді де дамытамын: түрлі мақалалар оқимын, жаңалықтардан хабардар болып отырамын. Гербицидтер іздеу, ауыл шаруашылығы техникасының қосалқы бөлшектерін табу қиын емес. Бұрын менде тек мобильді интернет қана бар еді. Ол тұрақсыз әрі смартфонмен жұмыс істеу мүмкіндігі шектеулі болатын», – дейді шаруа қожалығының жетекшісі Құдайберген Бисімбаев.
Еліміздің өзге де ауылы сияқты кең жолақты интернет пайда болғалы 500 тұрғыны бар Ырсайдың да өмірі біртіндеп өзгеріп келеді. Әлеуметтік желідегі мессенджерлер мен пабликтерде ауыл чаттары құрылды.
Валерий Кулаков ауылдастарының түйінді мәселесін жақсы біледі. Өйткені ол ауылға 18 жылдан бері басшылық жасап келеді. Ауыл әкімі интернет жоқ кезде ауыл тұрғындары қандай қиындыққа тап келгенін қазір өткен шақпен еске алады.
«Қазір ауыл тұрғындары мемлекеттік қызметтерді үйден шықпай-ақ онлайн түрде алады. Бұрын олар ауыл әкімдігіндегі өзіне-өзі қызмет ету бұрышын пайдаланатын», – дейді ауыл әкімі Валерий Кулаков.
«Қазақтелекомның» жылдам интернетінің арқасында тағы бір ырсайлық Ольга Юнның көптен күткен арманы іске асып, ол оригами (қағаздан түрлі бұйымдар жасау) жинауды қолға алды. Ольга мектепте жұмыс істейді және балалармен бірлесіп, қағаз қиындыларынан түрлі бұйымдар мен аппликациялар жасауды жаны сүйеді. Алайда бұған дейін сабаққа дайындалу оңайға соқпайтын. Видео-сабақты жүктеп алу үшін ұстаз күре жолдың бойына шығып, ұялы байланыс ұстайтын жерді іздейтінін айтады.
«Өткен жылы карантин кезінде біліктілік арттыру курсынан қашықтан өттім. Өте қиын сегіз айды бастан кешірдім. Әлсіз де болса байланысты ұстау ұстау үшін телефонды терезеге жапсырып қоятынмын. Көз майымды тауысып, түнімен отырып тапсырма орындаған кездерім болды. Ал қазір бәрі оңай, сәндік-қолданбалы өнерге қатысты видео-сабақтар көремін, одан соң көрген-білгенімді балаларға үйретемін. Енді конкурс ұйымдастырғым келеді», – дейді Ольга.
Естеріңізге салайық, өткен жылы «Қазақтелеком» талшықты-оптикалық байланыс құрылысы бойынша аса ірі инфрақұрылымдық жобаны аяқтап, республика бойынша 828 ауылға, Қостанай облысында 39 елді-мекенге кең жолақты сапалы интернет тартты. Сондай-ақ тағы 21 ауыл жылдам интернетке қосылды.
«Жыл басынан бері дәл осындай технология бойынша Боскөл, Сокол, Приреченка ауылы тұрғындарына интернетке қосылу қызметін ұсындық. Бір апта бұрын Сорочинка және Крыловка елді-мекендерін қосуды қолға алдық. Ауыл тұрғындарын жылдам интернетпен қамтамасыз ету үшін аймақта жүйені одан әрі дамытуды жоспарлап отырмыз», – деп атап өтті «Қазақтелеком» АҚ Солтүстік ӨТД филиалының телекоммуникациялық жүйені дамыту бойынша директорының орынбасары Олжас Татаев.
Бұдан бөлек, «ТОБЖ АЕМ» желілік инфрақұрылым жобасы негізінде «Қазақтелеком» компаниялар тобы – «Кселл» және «Теле2» ұялы байланыс компаниялары келесі бір жоба «250+» аясында 600 мың тұрғыны бар 928 ауылды мобильдік жылдам интернетпен және байланыспен қамтамасыз ету үшін базалық станцияларын орнатпақ.
