«Қазақтелеком» интернеті жиһаз кәсібінің көрігін қыздырды
Ұстаздықтан – кәсіпкерлікке. Жамбыл облысы, Шу ауданы, Алға ауылының тұрғыны Дархан Мұқановты ауылдастары информатика пәнінің мұғалімі деп танитын. Сабағынан бос уақытында ол ағаш жонып, үйіне жиһаз дайындауды ермек еткен. Мұны көрген көршілері диван, үстел секілді керек-жарақтарына тапсырыс бере бастайды. Осылайша шебердің аты ауылға кең тарайды.
Ал аймаққа интернет кіргелі, Дархан Мұқановтың клиенттік базасы күрт өсіп, Қазақстанның түкпір-түкпірінен тапсырыстар келіп түсе бастады. Бұған «Қазақтелеком» жүзеге асырған қос жоба: талшықты-оптикалық байланыс желілері және соның негізінде жүзеге асырылған Wi-Fi радио көпірі технологиясының интернеті сеп болды.
Естеріңізге сала кетейік, «Қазақтелеком» былтыр жыл соңында республиканың 828 елді-мекеніне талшықты-оптикалық байланыс желісінің жобасын аяқтаған болатын. Нәтижесінде «оптикаға» еліміздегі 2,5 мың мемлекеттік мекеме мен бюджеттік ұйымдары қосылды. Соның ішінде Жамбыл облысында 912 шақырым жерге талшықты-оптикалық байланыс желісі жүргізілгеннен кейін жоғары жылдамдықты интернетке 72 елді-мекендегі 223 мемлекеттік мекеме қосылған болатын. Жүйрік интернет игілігі Шу ауданының Алға ауылына да бұйырды.
Мұнымен құрылыс жұмысы аяқталған жоқ. Еліміздегі ірі телеком-оператор жобаның екінші сатысына көшіп, ауылдағы интернетті қаладағыдай деңгейге жеткізіп, ауыл мен қаладағы цифрлық теңдікті сақтауға күш салып отыр. Қазір Алға ауылындағы аймақта желілік жүйе реттеліп, Wi-Fi технологиясы бойынша радиокөпір орнатылып, 13 шақырым радиустағы елді-мекен мен үй шаруашылықтарындағы қабылдағыш модемдерге сигнал жеткізетін қуатты процессор қойылды.
Алға ауылындағы радиокөпір шамамен 20 мб/с жылдамдықтағы интернетпен қамтамасыз етеді. Бұл жергілікті тұрғындардың кез келген көлемдегі ақпаратты жүктеуге, бейнежазба көруге, онлайн-ойындар ойнауға, алыс-жақын жерде тұратын туыстарына видео-қоңырау шалып сөйлесуге, яғни, телекоммуникацияның басқа да қызметтерін пайдалануға мүмкіндік сыйлайды. Тағы бір артықшылығы – интернетте кідіріс болмайды. Себебі, ауылдағы базалық станцияға оптика арқылы жететін сигнал, электромагнитті іркілістерге жол бермейді.
Қазіргі сәтте Алғадағы радиокөпірге елді-мекеннің 2 мыңнан астам тұрғынынан 28 абонент қосылып үлгерді. Соның ішінде «Қазақтелекомның» жаңа қызметіне алғашқылардың бірі болып Амангелді атындағы орта мектептің информатика пәнінің мұғалімі Дархан Мұқанов тіркелді. Сол сәттен бастап, жүйрік интернеттің игілігімен шебер әлеуметтік желілерге өз жұмыстарын жүктеп, кәсібін жаңа деңгейге көтерді.
«Радиокөпірге қосылғаннан кейін Инстаграм желісінен парақша ашып, өзімнің жұмыстарымды сала бастадым. Бірте-бірте ауылымыздан ғана емес, ауданның басқа елді-мекендерінен, тіпті Қазақстанның ірі қалаларынан тапсырыс берушілер пайда болды. Негізінен көбі жаппа, ағаш баспалдақ, диван, корпусты жиһазға тапсырыс береді. Сапалы интернеттің арқасында өзіме қажетті құрылыс материалы мен ағаштарды таңдап, үйге жеткізіп беру қызметін пайдаланып жүрмін», – дейді Алға ауылының тұрғыны Дархан Мұқанов.
Телеком-оператор әр үйге жеткізген жоғары жылдамдықтағы интернет ауыл тұрғындарына жеке кәсібін жүргізіп қана қоймай, онлайн режимде білім алуға және жұмыс істеуге жағдай жасап отыр. Бұл қашықтан оқу кезінде мұғалім қауымына ауадай қажет болды. Амангелді атындағы орта мектептің орыс тілі және әдебиетінің мұғалімі Жанна Мұқатаева радиокөпір пайда болғанға дейін күн сайын кешке Kundelik электронды журналын толтыру үшін Шу ауданына баратын. Себебі, ауылдағы мобилді интернеттің жылдамдығымен үйде жұмыс істеу мүмкін емес еді. Жүйрік интернеттің ауылға келуімен қатар мұғалімдер сабылып 3 шақырым қашықтықтағы Шу ауданына барып-келмейтін болды, барлық қажеттілікті үйден ұзамай жасауға болады. Бұл уақытты да, қаржыны да айтарлықтай үнемдеді.
«Сымсыз интернетке қосылғалы бері қуанып жүрміз. Ноутбук, теледидар интернетпен жұмыс істеп тұр. Одан бөлек «Қазақтелекомның» екі сим-картасын алдық. Енді кәсіби біліктілігімді арттыру курсын онлайн оқитын болдым. Кішкентай немерелерім телеарнадан балаларға арналған бағдарламалар көріп, мұғалім келінім есебін онлайн толтырып, қажетті материалдарын алып жүр. Барлық мұғалім әріптестеріме интернетке қосылып алуға кеңес беремін», – дейді Жанна Мұқатаева.
«Қазақтелеком» ауылды жерлерге интернет тарту жұмысын жүргізіп қана қоймай, шағын және орта бизнес үшін жаңа тиімді бағыттар ұсынып отыр. Яғни ауылдық елді мекендерді интернетпен қамту ісіне басқа да жекеменшік компанияларды белсенді түрде тартуда. «Қазақтелеком» АҚ-ның Оңтүстік аймақтық телекоммуникация дирекциясы бүгінде жеке бизнеспен серіктестік шарт бойынша бірлесіп, олардың көмегімен ең алдымен байланысы жоқ елді-мекендерге интернет жеткізуді жоспарлап отыр.
«Біз Жамбыл облысындағы ауылдарға базалық станциясын орнату жөнінде «Link Шу ЖШС-мен әріптестік бойынша келісімге келдік. Әріптестік аясында Шу ауданының – Белбасар, Жаңажол, Бірлік-Үстем, Қонаев, Балуан-Шолақ, Ақтөбе, Абай, Бірлік, Көктөбе, Далақайнар, Мойынқұм, сондай-ақ Сауытбек, Төле би ауылдары мен Шу қаласына сымсыз интернет жеткізуді жоспарлап отырмыз. Әрбір базалық станция интернетке 300 абонентті қосуға мүмкіндігі бар», – дейді «Қазақтелеком» АҚ-ның Оңтүстік ӨТД сегменті В2С коммерциялық директоры Светлана Жұмашева.
Қазіргі уақытта Алға – Жамбыл облысындағы радиокөпір технологиясы бойынша интернетке қосылған бірден-бір ауыл. Осы технология арқылы өңірдің өзге де ауылдары жүйрік интернеттің пайдасын көрер күн алыс емес. Бұл «Қазақтелекомның» былтыр аяқтаған талшықты-оптикалық байланыс желісін жүргізу жобасының нәтижесі.
Естеріңізге салайық, ТОБЖ (талшықты-оптикалық байланыс желісі) жобасы мемлекеттік-жеке әріптестік аясында «Қазақстанның Даму Банкі» АҚ-ның қаржылық қатысуымен іске асты. «Қазақстанның Даму Банкі» 26,7 млрд теңге көлеміндегі несиені 13 жыл мерзімге берді.
