Қожамжаровтың маңайындағы тағы бір адамға үкім шықты
Антикордың экс-төрағасы, бұрынғы бас прокурор Қайрат Қожамжаровтың командасында қызмет атқарған тергеуші Жандос Әріп «Қорғас ісі» бойынша материалдарды қолдан жасағаны үшін кінәлі деп танылды, деп хабарлайды Elmedia.
Алматы, NEGE. Қаржы полициясының бұрынғы тергеушісі Жандос Әріп «Қорғас ісі» бойынша бейнежазбаларды қолдан жасағаны анықталды.
«Қысқаша айтқанда, 2011–2012 жылдары қаржы полициясына жаңадан қызметке келген тергеуші Әріп ҰҚК-нің жоғары лауазымды қызметкерлері – Талғат Жақаев пен Ирлан Абдрахмановты қылмыстық жауапкершілікке тарту үшін дәлелдемелер базасын жинаумен белсенді түрде айналысқан. Қаржы полициясының тергеушісі, шамасы, басшылықтың (Мақсат Дүйсеновтің) тікелей нұсқауларын орындай отырып, Алматыдағы мейрамханалардың бірінде түсірілген бейнежазбаларды қолдан жасап, дәлел ретінде ұсынған. Ол бейнематериалдарда «ұйымдасқан қылмыстық топтың көшбасшысы», сыртқы экономикалық қызметпен айналысқан кәсіпкер Талғат Қайырбаевтың ҰҚК қызметкерлерімен кездескені көрсетілгендей етіп жасалған», – делінген материалда.
Шын мәнінде ол жерде басқа адамдар болған, мұны олардың өздері де растапты.
- Тақырыпқа орай: Он жылдық ойран. Қайрат Қожамжаровты кім ұстап береді?
Бұдан бөлек, биллинг деректері мен іссапар құжаттарына сәйкес, Жақаев пен Абдрахманов аталған кезеңде Алматы қаласында болмаған.
«Контрабандамен айналысушылардың ҰҚК қызметкерлерімен байланысы бар» деген ақпарат сол кездегі президент Нұрсұлтан Назарбаевқа жетіп, сондай-ақ бұқаралық ақпарат құралдарында тараған.
«Осы деректер ҰҚК офицерлерін ұстау мен қамауға алуға негіз болды. Оларға «қылмыстық топтың кездесуінде» «басты контрабанда өкіліне» құпия ақпарат берді деген айып тағылған. Кейін Жақаев пен Абдрахмановтың ол жерде болмағаны дәлелденсе де, соттар тергеу органдарының өтінішімен олардың қамауда ұстау мерзімін бірнеше рет ұзартқан. Бұл іспен сол кезде қаржы полициясының тергеу департаментін басқарған, кейін Алматы қаласы прокурорының орынбасары болған Нұрлан Ауғанбаев тікелей айналысқан», – делінген басылым мәліметінде.
Айта кетейік, 2025 жылғы тамыз айынан бастап қазіргі уақытқа дейін Ауғанбаев Қазақстан Республикасы Бас прокуратурасының Алматы облысы бойынша Құқықтық статистика және арнайы есепке алу комитеті департаментінің басшысы қызметін атқарып келеді.
2023 жылы Бас прокуратураның ведомствоаралық тергеу-жедел тобы сотқа дейінгі тергеп-тексеру жұмыстарын бастап, бұл іс биылғы жылдың басында сотқа жолданды.
«Алайда Алматы қаласы Медеу аудандық №2 сотының судьясы Жомарт Мұхамбетжан алдын ала тыңдаудың өзінде-ақ қорғау тарапының «елеулі процессуалдық бұзушылықтар бар» деген өтінішін қанағаттандырып, істі қосымша тергеу жүргізу үшін прокуратураға қайтарды. Кейін, тамыз айында, іс қайтадан сотқа жолданып, тағы да сол Мұхамбетжанның өндірісіне түсті. Бүгін дәл осы судья айыптау үкімін шығарды. Айта кетейік, Жандос Әріп нақты бас бостандығынан айыру жазасын алған жоқ – іс ескіру мерзімінің өтуіне байланысты тоқтатылды», – делінген хабарламада.
Бұған дейін Жандос Әріптің басқа да бұрынғы әріптестеріне қатысты үкімдер шығарылған: олар дәл осы істің фигуранттарына қатысты дәлелдемелерді қолдан жасағаны және азаптағаны үшін сотталған. Бұдан бөлек, бұл тізбек ақырындап «Қорғас ісінің» басты бенефициарына – сол кездегі төраға Қайрат Қожамжаровқа алып келеді.
