Жамбыл облысы: Халықтың табысы артып, тұрмысы жақсарып келеді

 Президент тапсырмасымен әзірленген «Халықтың табысын арттыру» бағдарламасын атқаруға айрықша ден қойылып отыр. 

Биыл субсидияға бөлінген қаржы көлемі 49 пайызға артты

Жамбыл облысының әкімі Нұржан Нұржігітов биыл субсидияға 31,2 млрд теңге бөлінгенін жеткізді. Бұл көрсеткіш өткен жылмен салыстырған 49 пайызға артқан. «Аталған қолдау шараларымен әрбір ауыл, әрбір кәсіпкер, шарулар қамтылуы тиіс. Бұл жұмыстарды нәтижелі іске асыру – аудан, ауыл әкімдерінің негізгі міндеті», – деді әкім.

  2021 жылы облыстың ауылшаруашылығы саласын қолдауға барлық қаржы көздерінен 36,3 млрд теңге, оның ішінде 19,4 млрд теңге субсидия мақсатында қаралған болса, биыл бұл мақсатқа 60 млрд теңге бөлінген. Сондай-ақ, аймақ басшысы 2019 жылы бастау алған ауыл тұрғындарының тұрмыстық табысын жақсарту бағытындағы пилоттық жоба өзінің жалғасын табатынын айтты.

«Бір ай бұрын облысқа арнайы келген үкіметтік делегация жобаның тиімділігіне көз жеткізіп, бұл тәжірибені ел көлемінде тарату ісін қолға алуда. Жобаның бірінші кезеңінде өңірдегі 11 ауылдық округке қарасты 25 елді мекендегі 7 856 отбасы қамтылды. Айтарлықтай нәтижеге қол жеткіздік. Бұл мақсатта жалпы 9,2 млрд теңге несие қаражаты бағытталды», – деді өңір басшысы.

Айта кету керек, 2021 жылы қайтарылған несиелер есебінен қосымша 3 ауылдық округте жоба жалғасын тапқан. Пилоттық жобамен өңірдегі қалған 139 ауылдық округтерді қамтуға қажетті қаржы көлемі 75,5 млрд теңгені құрап отыр. Бұл ұсыныс Үкімет тарапынан қолдау тапты. Облыс әкімінің айтуынша, өңірде бұл жобаны тиімді жүзеге асыру үшін тәжірибе де, кадр да жеткілікті.

Биыл пилоттық жоба аясындағы жеңілдіктермен қамту үшін облыстың тағы 10 ауылдық округі анықталды. Бұл бағытқа 6,4 млрд теңге қаржы қажет. Қазіргі таңда жобаның бес бағыты бойынша ауылдық округтердің жоба-есептері нақтыланбақ.

2025 жылға дейін 1154 жоба жүзеге асады

Жамбыл облысының 2025 жылға дейінгі даму жоспарының жаңа сипаттағы жобасы әзірленді. Бұл туралы облыс әкімі Нұржан Нұржігітов  осы жылдың 6 айындағы негізгі даму көрсеткіштеріне қысқаша тоқталып, алдағы жоспарлар туралы кеңірек баяндады.

Бірінші жартыжылдықта  облыстың экономикалық өсімі 104,1 пайызды құраса, өнеркәсіп (108,1%), ауыл шаруашылығы (102%), құрылыс  (105,7%), тұрғын үй құрылысы (103,7%), сауда  (105,3%), байланыс  (101,9%) салаларында оң динамика сақталған. Есепті кезеңде өңірге 155,8 млрд теңге инвестиция тартылған.

Басты талап – халықтың табысын арттыру, тұрмысын жақсарту, қордаланған мәселелерін шешу деген Нұржан Нұржігітов Президент тапсырмасымен әзірленген «Халықтың табысын арттыру» бағдарламасын жемісті жүзеге асыруға айрықша ден қойылып отырғанын атап өтті.

 Аймақ басшысы 2025 жылға дейінгі Жамбыл облысының даму жоспарының жаңа сипаттағы жобасы әзірленгенін жеткізді. «Мақсат –  ауыл шаруашылығы және өнеркәсіпті дамыта отырып, ауыл тұрғындары үшін тұрақты жұмыс орындарын құру, тұрмыс жағдайын жақсарту, табысын арттыру. Жоспар халықтың әлеуметтік игіліктер мен мемлекеттік қызметтерге қолжетімділігін қамтамасыз ету және жалпы жайлы өмір сүру ортасын қалыптастыру бойынша бірқатар міндеттерді шешуді көздейді», – деді әкім.

  Даму жоспары 3 негізгі бөлімнен тұрады. Олар – инвестициялық жобалар, бюджеттік инвестициялық жобалар, жұмыспен қамту. Алғашқы бөлім екі ірі – ауыл шаруашылығы және өнеркәсіп салаларында 2025 жылға дейін құны 2  трлн теңгені құрайтын 1154 жобаны іске асыра отырып, 14,4 мың жұмыс орнын ашуға бағытталған. Осы даму жоспары аясында агроөнеркәсіп кешені саласында жалпы құны 73,5 млрд теңгені құрайтын 711 жобаны іске асырып, 4,3 мың жаңа жұмыс орнын ашу көзделуде. Жалпы, бұл салада 110 жоба іске қосылып, 400-ге жуық адам тұрақты жұмысқа орналаспақ.

Бұдан өзге агроөнеркәсіп кешенін дамыту 10 бағытта жүзеге асады. Облыс әкімінің айтуынша, ауылдық елді мекендерде кооперация жүйесін дамыту мақсатында аудан әкімдері елді мекеннің ауыл шаруашылығы саласы әлеуетін түбегейлі зерделеп, әр ауылдық округтің өнім өндіру, қайта өңдеу және өнімді өткеруде кластерлік тәсілді қолданып, жоспарын әзірледі. Бұл тәсілді қолдану үшін 10 ауданнан бір ауылдық округтен, Тараз қаласынан бір массив таңдап алынды. Аталған жобалар кластерлік бағытта «бір ауылда – бір жоба» қағидатымен жүзеге асырылатын болады.

100 пайыз ауыз сумен және көгілдір отынмен қамтылады

Жамбыл облысының тұрғындары 2025 жылға қарай ауыз сумен және көгілдір отынмен толықтай қамтамасыз етіледі. Бүгінгде облыстағы ауылдық елді мекендердің 269-ы (622 мың тұрғын) орталықтандырылған ауыз сумен қамтылған. Биыл тағы 30 елді мекендегі 40,2 мың тұрғын сапалы ауыз суға қол жеткізеді деген жоспар бар.

Одан бөлек биыл қосымша 17 елді мекендегі 10 мың үй көгілдір отырған қосылады. Осылайша, 2025 жылға қарай облыстағы 371 елді мекен 100 пайыз ауыз сумен қамтылып, табиғи газды тұтынатын болады.

Өңір басшысының сөзінше, бұл межеге қол жеткізу үшін 62 ауылға су құбырын тартып, 40 ауылдың ауыз су жүйесін жаңғыртып, 31 ауылға су тазалау блок модулі орнатылады. Сондай-ақ, бүгінгі таңда облыстағы 36 елді-мекенде ауыз су кестемен беріледі десек, биыл аталған ауылдардың саны 30 пайызға дейін қысқармақшы.

Сонымен қатар, 15 елді мекенге газ тартып, 50 елді мекенге табиғи газ жүйелерін тарту арқылы және 2 автономды газ тарату станциясының құрылысы жүргізіліп, бұл мәселе де оң шешімін табатын болады.