Каспий нефть. Кеңес Рақышев Құлыбаевпен НЕГЕ келісуі мүмкін?
«Fincraft Energy» энергетикалық холдингін құрып жатқан кәсіпкер Кеңес Рақышев үшін «Каспий нефть» акционерлік қоғамын сатып алу мәселесі күн тәртібіне шығуы мүмкін. Nege.kz тілдескен дереккөз осындай пікірде. Бірақ ол үшін Кеңес Рақышев алдымен «Tethys Petroleum» мұнай компаниясының қалған 68,04% акцияларын сатып алуы керек.
Астана, NEGE. Миллиардер Кеңес Рақышевке тиесілі «Fincraft Group» өткен аптада өзінің энергетикалық активтерін бөлек шығарып, жаңа мұнай-газ холдингін құрып жатқанын ресми растаған болатын. Жаңа холдинг Fincraft Energy Holding Limited деп аталады. Fincraft тобы еншілес холдингке «Tethys Petroleum Limited» мұнай компаниясындағы өзіне тиесілі 30,9 миллион акцияны өткізді. Бұл – компанияның 26,95 пайыз үлесі.
Бірақ толыққанды холдинг құру үшін Рақышевке Tethys Petroleum-ның басқа акционерлердің қолында жүрген қалған 68,04% акциясын сатып алып, компанияны толық өз иелігіне алу керек. Бұған дейін кәсіпкер басқа акционерлерге бір акция үшін 1,75 канадалық доллар ұсынған еді. Сонда Кеңес Рақышев «Tethys Petroleum» компаниясына толық иелік ету үшін 81,7 миллион АҚШ долларын төлеуге әзір. Тараптар ортақ мәмілеге келіп, жақын арада бұл келісімді аяқтайды деп күтілуде.
- Тақырыпқа орай: Tethys минуста болса да, Кеңес Рақышев НЕГЕ мұнайға сеніп отыр?
Tethys мәселесі шешілсе, Кеңес Рақышев басқа миллиардер Тимур Құлыбаев сата алмай отырған «Каспий нефть» мұнай компаниясын сатып алу мүмкіндігін қарастыра алады. Tethys 2024 жылы 12,4 миллион доллар шығын көрсетсе, сол жылы «Каспий нефть» акционерлік қоғамы 33,5 миллиард теңге таза пайда тапқан.
Қазіргі таңда «Каспий нефть» капиталы 104 миллиард теңге шамасында бағаланып отыр. Компанияның нарықтық құны да осы төңіректе. Географиялық жағынан, Tethys-тің «Аққұлқа», «Қызылой», «Құл-Бас» мұнай кеніштері Ақтөбе облысында орналасса, «Каспий нефть» Атырау облысындағы Айранкөл кенішінде жұмыс істейді.
Енді Атыраумен байланысуға Рақышевтің ниеті бар ма деген сұрақ тууы мүмкін. Ол Ақтөбені көбірек жақсы көреді. Сондай-ақ оның иелігінде 100 миллиард теңге көлемінде еркін қаражат болуы тиіс.
Наурыз айынан кейін Fincraft тобының 2025 жылғы аудиттелген есебі шығуы тиіс. Кеңес Рақышевтың басқа мұнай компанияларын сатып алу мүмкіндігінің бар-жоғы сол кезде белгілі болады.
