Forbes Kazakhstan сайтына хакерлік шабуыл жасалып жатыр
Forbes Kazakhstan акционері Арманжан Байтасов 29 қазаннан бері басылымның сайты мен бүкіл инфрақұрылымына бағытталған хакерлік шабуылдар болып жатқанын мәлімдеді. Соңғы екі күнде сайтқа 120 мыңнан астам күмәнді сұраныс түскен.
Астана, NEGE. Кәсіпкер Арманжан Байтасов бұл туралы әлеуметтік желідегі үндеуінде мәлімдеді. Оның сөзінше, белгісіз хакерлік топтар басылым сайтының жұмысын бұзуға және әкімшілік панеліне кіруге тырысып жатыр.
«Шабуылдаушылар әкімшілік панелімізге кіруге тырысып, парольдерді қайта-қайта іздеп жатыр. Сонымен қатар сайттағы көптеген бетті жүктеп алмақ», – деді ол.
Байтасовтың айтуынша, мамандар шабуылдарды талдай келе, хакерлердің мақсаты сайттың жұмысын бұзып, редакция саясатына қайшы келетін материалдарды жариялау болуы мүмкін деген қорытындыға келген.
Сонымен бірге Forbes Kazakhstan акционері барлық шабуылға сәтті тойтарыс беріліп жатқанын атап өтті. Қазір сайт пен редакция қалыпты режимде жұмыс істеп тұр.
Айта кетейік, бұған дейін «Ақ жол» партиясының бұрынғы төрағасы Азат Перуашев пен партияның әлеуметтік желідегі ресурстарына DDoS-шабуылдар жасалып, мессенджерлер арқылы жалған ақпараттық хабарламалар таратылған еді. Осыған байланысты Құрылтайдың вице-спикері, «Ақ жол» партиясының төрайымы Дания Еспаева құқық қорғау органдарына да жүгінген.
Сонымен қатар Перуашевке қатысты ақпараттық шабуыл NEGE редакциясын да айналып өтпеді. Ал 28 қыркүйек күні NEGE бас редакторы Аделаида Ауеспекова басылымның ресми Telegram-арнасына ұқсас клонның пайда болғанын хабарлады. Жалған арнада NEGE-нің жарияланымдары, дизайны мен бекітілген хабарламалары толықтай дерлік көшірілген. Алайда аталған арнада Азат Перуашевке қатысты жарияланған материалдарды NEGE редакциясы әзірлеп, таратпаған.