Алматыда жер сілкінді: Қалада дабыл қосылып, тұрғындар сыртқа шығып жатыр
ҚР ТЖМ «Сейсмологиялық зерттеу институты» ЖШС сейсмикалық станциялар желісі 2025 жылғы 4 желтоқсанда Астана уақытымен 12:45-те жер сілкінісін тіркеді.
Алматы, NEGE. Жер сілкінісі туралы хабарлама алған алматылықтар ғимараттардан сыртқа шығып жатыр.
Жер дүмпуінің ошағы Қытай аумағында Алматы қаласынан оңтүстік-шығысқа қарай 277 км жерде орналасқан. Еуропа–Жерорта теңізі сейсмологиялық орталығы мәліметінше, жерасты дүмпулері Қытайдың оңтүстік Синьцзян аймағында болған магнитудасы 6,1 жер сілкінісімен байланысты.
Есептік қарқындылығы:
Алматы қаласы – 3 балл;
Алматы облысының аумағында – 2-3 балл;
Жетісу облысының аумағында – 2 балл;
Жамбыл облысының аумағында – 2 балл.
«Зардап шеккендер мен қираулар туралы мәлімет түскен жоқ. Ақпарат анықталып жатыр», – делінген министрліктің хабарламасында.
Бұған дейін Алматыда жер сілкінісі кезінде хабарлау жүйесінің істен шығуына байланысты жауапты шенеуніктер жазаланғанын жазғанбыз.