Бетания Де Ла Крусды Ахметов алатын болды, енді Баталов қайтер екен?
Волейболдан клубтық әлем чемпионатының және Чемпиондар лигасының жеңімпазы Бетания Де Ла Крус Өскеменнің «Алтай» клубында ойнайтын болды. Бұл туралы Vesti.kz хабарлады.
Алматы, NEGE. 34 жастағы волейболшы Доминикан Республикасының құрама командасы сапында түрлі жарыстарда жеңімпаз болған. Ал клубтық деңгейде Пуэрто-Риконың, Жапонияның, Кореяның, Ресейдің, Италияның және Түркияның клубтарында ойнаған.
Бетания Де Ла Крус.
2015 жылы клубтық әлем чемпионатының және Чемпиондар Лигасының жеңімпазы болған «қара қыз» енді өскемендік «Алтайдың» сапында ойнайды.
Жалпы, спортта біздің әкімдердің арасында жасырын бәсеке бар. Айталық, футболда алматылық «Қайрат» пен астаналық «Астана» арасындағы ойын қашанда қызу өтеді. Құдды бір бұрынғы астана мен қазіргі астана әкімдерінің арасындағы тартыс сияқты.
Волейболда да солай. Соңғы жылдары Алматы облысының «Жетісу» командасы мен ШҚО-ның «Алтайы» арасындағы ойын сұмдық тартысты өтіп жүр. 2008 жылдан бері «Алтай» мен «Жетісу» итжығыс түсіп жүр екен. Өткен жылы «Жетісу» жеңсе, биыл «Алтай» алыпты.
Д.Ахметов пен А.Баталов.
ШҚО әкімі Даниал Ахметов Бетания Де Ла Крусды қағып түсті де, «Алтай» клубын бұрынғыдан да күшейтті. Ал Алматы облысының әкімі Амандық Баталов биыл тентек «қара қыздарымен» қоштасып, «Жетісуды» біршама әлсіретіп алды.
- Тақырыпқа орай: «Жетісудың» волейболшы қыздары НЕГЕ тентектік жасады?
«Волейболшы әкімге» шығыстың «волейболды қатырмайтын әкімінен» қалып қоюға әсте болмайды. Біздің ойымызға бірден Жаклин Карвальо, Келси Робинсон немесе Бетанияның жерлесі Вильмари Мохика сияқты ойыншылар түскен. Шебер десең – шебер, сұлу десең – сұлу! Әй, бірақ Баталовтың талғамы бөлек болуы мүмкін ғой, ә?..
