Жәнібек Әлімханұлының жекпе-жегі өтпейтін болды
Боксшы Жәнібек Әлімханұлы 7 желтоқсан күні АҚШ-тың Техас штатында кубалық Эрисланди Ларамен қолғап түйістірмейтін болды.
Астана, NEGE.Үш чемпиондық белбеуді сарапқа салатын кездесу кейінге қалды. Ерікті допингке қарсы VADA ұйымы қазақстандық боксшының допинг сынамасынан тыйым салынған мельдоний препараты табылғанын хабарлады.
Осы жағдайға байланысты Жәнібек Әлімханұлының командасы ресми мәлімдеме жасады. Олардың айтуынша, қазір менеджерлер мен заңгерлер жұмыс істеп жатыр және қайта анализ тапсыруға өтініш жасаған.
«Бұрын алынған сынаманың екінші нұсқасын да тексерту және зертханадағы процестер бойынша жұмыстар жүргізілуде. Мамандардан жауап күтіп отырмыз», – делінген хабарламада.
WBO-да ресми мәлімдеме жасады. Олардың хабарлауынша, қазір ішкі тергеу жүргізіліп жатыр екен. Бәрі аяқталғаннан кейін ұйым тарапынан қосымша ақпарат беріледі.