Табысы көбейсе, капиталы азайды. «Air Astana» акциялары НЕГЕ құлдырауда?
2025 жылдың жарты жылында «Air Astana» ұлттық тасымалдаушысы бір акциясының баланстық құны былтырғы 579 теңгеден 532 теңгеге дейін арзандаған. Оған ұлттық компанияның меншікті капиталының 15 миллиард теңгеге азайып қалуы себеп болды
Қазір Air Astana капиталының көлемі 192 миллиард теңгені құрайды. Бір жыл бұрын ол 207 миллиард теңгеге барып тұрған еді. Есесіне, компанияның міндеттемелері 110 миллиард теңгеге көбейіп, бүгіндері 854 миллиард теңгеге жетті.
Мойындау керек, 2025 жыл Air Astana үшін былтырға қарағанда жаман өтіп жатқан жоқ. Былтырғы төменгі базаның арқасында, биылғы жартыжылдықта выручканы 12%-ға, ал таза пайданың 131%-ға өсіру мүмкін болды.
Бірақ әуе компаниясының қаржылық көрсеткіштерінің жақсарғанын нарық мойындамай отыр. Сондықтан биржадағы айналымда жүрген акциялары әлі күнге дейін IPO-дағы бағасынан 40 пайызға арзан сатылуда. Компания инвесторлардың мұндай төмен бағасымен келісе алмаса да, ештеңе істей алмайды.
Былтыр Air Astana акция иелеріне таза пайданың 20 пайызын дивиденд ретінде үлестірген еді. Бірақ былтырғы таза пайдасы небары 25 миллиард теңге болғандықтан, дивидендке бағытталған 5 миллиард теңге жұмырға жұқ болмаған сыңайлы. Сондықтан инвесторлар дивидендтік төлемнен кейін AIRA тикетіндегі акциялардан тез құтылуға тырысты.
Тақырыпқа орай: Выручка өседі, таза кіріс құлайды. Air Astana-ға НЕГЕ сұрақ көп?
Бірақ биыл компания акциялары кәдімгідей қымбаттауы мүмкін. Себебі, таза пайданың кемінде 30 пайызын дивидендке бағыттауға шешім қабылданды. Және биылғы таза пайда жоқ дегенде 50 миллиард теңгеге жетуі ғажап емес. Онда 15-20 миллиард теңге дивидендке бөлінбек. Ол инвесторларды қызықтыра алады.
Мұнда тек компанияның ішкі лоукостері Fly Arystan ғана проблема туғызып тұр. Флай Арыстан биылғы жарты жылдықта 2,8 миллиард теңге таза шығын алып келді.
Қазір Air Astana әуе паркі 61 ұшақтан тұрады. Оның бірнешеуі биыл ғана жеткізілген. Ұшақтардың басым бөлігі тар фюзеляжды. Және компания «Embraer» әуе кемелерін қолданыстан толықтай алып тастады. Компания тобы 2029 жылға қарай флотты 84 әуе кемесіне дейін ұлғайтуды көздеп отыр.
«Air Astana» компаниясында қазір бақылаушы акционер жоқ. Мемлекет ең ірі мажоритар болса да, толық бақылау құқығынан айрылды. Сонда «Самұрық-Қазына» қорының үлесі 41%, Citibank (номиналды ұстаушы) - 21,7%, BAE Systems - 17%, БЖЗҚ - 6,6%. Қалған акциялар миноритарлық акционерлердің қолында.
