Сот Әлия Назарбаеваның бұрынғы күйеуін банкрот деп танудан бас тартты
Сот Данияр Хасеновтың өзін банкрот деп тану туралы өтінішін қанағаттандырмады. Мұндай шешімнің қабылдануына оның мүліктік жағдайы мен табыстары туралы толық әрі нақты ақпараттың болмауы себеп.
Алматы, NEGE. Іс материалдарына сәйкес, Хасеновтың «Проблемалық несиелер қорына» қарызы 23,8 млрд теңге. Қарыз 2003 жылы «Казкоммерцбанк» АҚ пен «АзияПромСбыт» ЖШС арасында жасалған несиелік желі ашу туралы келісім аясында пайда болған. Міндеттемелердің орындалуы басқалармен қатар Данияр Хасеновтың жазбаша кепілдігімен қамтылған.
Қаржы менеджерінің айтуынша, қазіргі уақытта борышкердің жылжымалы да, жылжымайтын да мүлкі жоқ, ал орташа айлық табысы – нөл теңге. Бұл ретте Хасенов бірнеше заңды тұлғалардың тең иесі: ол Petroleum Invest Corporation LLC (65%), Imperial Invest Corporation LLC (90%), United Technologies and Finance LLC (50%) және Football Club Megasport LLC (50%) акцияларына ие.
- Тақырыпқа орай: Әлия Назарбаева бұрынғы күйеуімен НЕГЕ соттасып жүр?
Толық төлем қабілетсіздігі туралы мәлімдемеге қарамастан, сот «Petroleum Invest Corporation» ЖШС-нің 2024 жылы 9,5 миллион теңгеден астам салық төлегенін анықтады, ал Хасенов үлесі бар басқа компаниялар таратылмаған және банкрот деп танылмаған. Бұл ретте қаржы менеджері аталған компаниялардың қаржылық жағдайына баға бермеген және бірлескен бірнеше борышкерлерді жауапкершілікке тарту туралы қорытынды бермеген.
«Сот борышкер Хасенов Д.-ның іс-әрекетінен адалдық қағидатын көрмей отыр, себебі ол шарттық міндеттемелер бойынша үлкен соманы кепілгер ретінде қабылдап, бірақ олардың қайтарылуына қатысты ешқандай әрекет жасаған жоқ», – деп мәлімдеді судья.
Сот қарыздың болуы азаматты банкрот деп тану үшін жеткіліксіз екенін атап өтті. Табыстың болмауының объективті себептерін растайтын (ауырғаны, мүгедектігі немесе еңбекке жарамсыздық сияқты) құжаттар ұсынылмаған.
Сондай-ақ Хасеновтың отбасылық жағдайы туралы жазбаша ақпарат берілмеген.
«Жоғарыда анықталған фактілер борышкердің өзінің нақты қаржылық жағдайы туралы ақпаратты жасырып отырғанын көрсетеді. «Кредитордың алдында ақшалай міндеттемелер туындаған кезеңде борышкердің төлем қабілеттілігін қамтамасыз ету үшін жеткілікті және тиісті шараларды қолдануға әрекет жасағаны туралы сотқа дәлелдемелер ұсынылмаған. Қарыз пайда болған кезде борышкер өзінің төлем қабілеттілігін қамтамасыз ету үшін жеткілікті әрі дұрыс шаралар қабылдауға тырысқаны туралы сотқа ешқандай дәлелдер ұсынылмаған», - деп атап өтті судья.
Данияр Хасенов – бұрынғы футболшы, ҚТЖ топ-менеджері. Әлия Назарбаева екеуінің ортақ балалары бар.
