Щучинсктегі жарылыс: «Центр плова» дәмханасының иесі ұсталды
Сегіз адам қаза болған дәмханадағы өртке қатысты тергеуді Бас прокуратура ерекше бақылауға алды.
Астана, NEGE. Ақмола облыстық прокуратурасының хабарлауынша, кәсіпкердің үстінен Қылмыстық кодекстің 292-бабының 3-бөлігі бойынша (Абайсызда екі немесе одан да көп адамның өліміне әкеп соққан өрт қауiпсiздiгi талаптарын бұзу) қылмыстық іс қозғалды.
«Қылмыстық істі арнайы прокурорлар тергеп жатыр. 2 наурызда "Центр плова" дәмханасының иесі ұсталды. Қазіргі уақытта қажетті тергеу амалдары жүргізілуде», – делінген хабарламада.
Айта кетейік, Щучинск қаласында бес қабатты тұрғын үйге жапсарлас орналасқан дәмханада 27 ақпанға қараған түні газ-ауа қоспасы жарылып, артынша өрт шыққан. Оқиға салдарынан 28 адам зардап шекті, оның ішінде 5 адам оқиға орнында, тағы үш адам ауруханада көз жұмды.
Өрт сөндірушілердің жедел әрекеттерінің нәтижесінде отқа оранған дәмханадан көлемі әрқайсысы 50 литр болатын 5 газ баллоны және 2 оттегі баллоны сыртқа шығарылды. Бұл ғимарат ішінде қайталама жарылыстардың алдын алуға мүмкіндік берді.