Павлодарда бүйрегін 50 мың долларға сатпақ болған Ресей азаматшасына үкім шықты
Әйел бүйрегін Telegram арқылы саудалаған.
Астана, NEGE. Павлодар облыстық сотының хабарлауынша, 2024 жылы Ресей Федерациясының азаматшасы пайдакүнемдік ниетпен Telegram мессенджері арқылы бүйрегін 50 мың долларға сатуға келісім жасаған.
Келісім шарттарына сәйкес, трансплантациялау Павлодар қаласында жасалуға тиіс болған.
«2025 жылы Д. Қазақстан Республикасына келіп, медициналық тексеруден өтіп, алдын ала 5 млн теңге көлемінде ақшаны алған, кейін оны полиция қызметкерлері ұстады», – делінген сот хабарламасында.
Сот оның кінәсін мойындауын, өкінуін, асырауында жас балаларының болуын ескеріп, 10 айға бас бостандығынан айыру жазасын тағайындаған. Алайда күзетпен ұстауда болған уақытты ескере отырып, жаза өтелді деп танылып, әйел қамаудан босатылды.
Үкім заңды күшіне енді.