Павлодар облысында емханалардың жұмысы қалай өзгертілді?
Павлодар облысында тұрғындардың шағымынан кейін алғашқы медициналық-санитарлық қызметті жаңғырту бағдарламасы әзірленді. Аймақ басшысы Әбілқайыр Сқақовтың айтуынша, оған апта сайын емханалардың пациенттерінен «хабарласу мүмкін емес», «ұзақ күтуге тура келеді», «дөрекі жауап берілді» деген тектес өтініштер түскен.
«Яғни, тұлғаға бағытталған жұмыс жүргізілмеді – адам мен оның жайлылығы ескерілмеді, - деді Әбілқайыр Сқақов ОКҚ-да өткен баспасөз мәслихатында. - Біз не істедік? Алдымен, мен өзім емханаларға бардым. Содан кейін облыстық денсаулық сақтау басқармасының басшылығымен және барлық тараптармен бірге call-орталықтар, тіркеу орындары, емханалар ішіндегі бағыттар қалай және қаншалықты тез жұмыс істейтінін талдадық. Осылайша, біз пациент үшін жағдайды жақсартуға бағдар алып, медициналық-санитарлық алғашқы қызметті қайта құрудамыз. Бүгінгі күні емханаға қоңырау шалу уақыты 4 есе қысқарды, медбикелік және цифрлық посттарды енгізу есебінен дәрігерлердің жүктемесі 35%-ға төмендеді, call-орталықтар мен тіркеу орнының 385 қызметкері оқытудан өтті. Бұл тек аралық нәтижелер».
Павлодар облысында балалық шақты қорғау бойынша шаралар да іске асырылуда. Әкім бұл жұмыстың негізгі төрт бағыты: әлеуметтік қолдау, ерекше қажеттіліктері бар балаларды оңалту, балаларға арналған спорттық инфрақұрылымды дамыту және жас таланттарды ынталандыру туралы айтты
«Балабақшалар мен мектептерде тегін ыстық тамақты қаржыландыруды 1,8 есеге, яғни, 4 млрд теңгеге дейін ұлғайттық. Қазір облыстағы оқушылардың жартысынан астамы осы қолдау шарасымен қамтылған. Ал 1 мамырдан бастап өңірдің үш қаласында барлық оқушылар үшін қоғамдық көлікте тегін жүру мүмкіндігі қарастырылған», - деді Әбілқайыр Сқақов.
Ол Павлодарда балаларды оңалту орталықтары үшін мемлекеттік органдардың үш ғимараты босатылғанын, сондай-ақ, облыстық оңалту орталығын қайта құру және жарақтандыру жоспарланғанын айтты.
