Өтті дәурен, қалқатай. Шәріпбаев үшін биыл НЕГЕ ауыр жыл болды?
Назарбаевтың үлкен қызы Дариға Назарбаеваның «бейресми» күйеуі, «Ескі Қазақстан» олигархы Қайрат Шәріпбаевтың бизнесінде үлкен қиындықтар туындап жатыр. Оның үміт күткен соңғы активі – «Үшқұю» мұнай компаниясы сот шешімімен реабилитация процесін бастады. Компанияның капиталындағы минус 50 миллиард теңгеге жетті.
Номиналды түрде Қайрат Шәріпбаевқа қазір «Үшқұю» акционерлік қоғамының 23% акциясы тиесілі. Ең ірі акционер болып келген Бахаридин Аблазимов былтыр өзінің 30 пайыз үлесін Ерлан Мырзағалиевке тапсырып кеткен болатын. Олигарх Ержан Достыбаев 10 пайыз үлес ұстап отыр.
«Үшқұю» бұрын «Аңсаған Петролеум» деп аталатын. Компания Маңғыстау облысындағы Жетібай кенішінен мұнай игереді және 2020 жылдан бері қаржылық қиындықтарға тап болды. 2021 жылы 6,9 миллиард теңге шығын, 2022 жылы 13,7 млрд теңге шығындалды.
2023 жылдың қорытындысы бойынша «Үшқұю» ақыры пайда көрсетіп, 29,4 миллиард теңге таза кіріс тапты. Алайда, капитал дефициті 49 миллиард теңге, ал компанияның өтелмеген шығыны 53,7 миллиард теңге болып отыр.
Қайрат Шәріпбаев үлесін ұстап отырған «Үшқұю» акционерлік қоғамы өзі игеріп отырған мұнай кенішінен айрылып қалуы мүмкін. Энергетика министрлігі Жетібай кенішін игеруге 2004 жылы берген келісімшартты өз тарапынан тоқтатып тастады. Ал кассациялық соттың қандай шешім шығарары белгісіз.
Тақырыпқа орай: Қайрат Шәріпбаев «ҚазМұнайГаздан» кетті
2022 жылы мемлекет Қайрат Шәріпбаевтан «GPC Investement» басқаратын газ өңдеу зауытын қайтарып алды. Бірақ «Үшқұю» мұнай компаниясына ешкім тиіспеді. Қайрат Шәріпбаевтың жанында жүрген серіктесі Ибадулла Сердіге іздеу жарияланса да, Шәріпбаевтың өзіне ешқандай сұрақ туындамағанына біраз адам таңдаңған болатын.
Бірақ оның барлығы бір күнде өзгеріп кетуі мүмкін дейді NEGE-нің дереккөзі. Бейресми иммунитет белгілі бір уақытқа дейін ғана созылады. 2025 жылдары «Ескі Қазақстан» серкелеріне қатысты жаңа қылмыстық істер ашылуы ғажап емес.
