Мұнай бағасының төмендеуіне байланысты ірі компаниялардан түсетін салық көлемі 37%-ға азайды
Бұл туралы бүгін Үкімет отырысында қаржы министрі Мәди Тәкиев мәлімдеді.
Алматы, NEGE. Оның айтуынша, биылғы жылдың 11 айында мемлекеттік бюджеттің кірістері 21,9 трлн теңгені құрап, жоспардың 100,1%-ы орындалды. Өткен жылдың сәйкес кезеңімен салыстырғанда өсім 2,9 трлн теңгеге жетті.
«Жалпы алғанда нәтижелер бюджет жүйесінің орнықтылығын, сыртқы факторлардың қысымы мен әлемдік экономиканың тұрақсыздығына қарамастан мемлекеттің барлық міндеттемесін қамтамасыз етуге қабілетті екенін көрсетіп отыр», – деді министр.
Мұнай бағасы мен экспорт көлемінің төмендеуіне байланысты ірі бизнестен жиналатын салық көлемі 37%-ға қысқарды.
- Тақырыпқа орай: Жыл басынан бері теңге бағамы 2,4%-ға нығайды – Ұлттық банк
«Әлемдік мұнай бағасының өткен жылмен салыстырғанда барреліне 12 долларға, ал болжамды деңгейден 5,4 долларға төмендеуі, сондай-ақ экспорт көлемінің 3,8%-ға қысқаруы ірі кәсіпорындардан түсетін салық түсімдерінің 37%-ға азаюына әкеп соқты. Осы сыртқы факторларға қарамастан, кірістер параметрінің тұрақтылығы сақталуда», – деді Тәкиев.
Республикалық бюджет кірістері 13,6 трлн теңгеге жетіп, өсім 1,8 трлн теңгені құрады, 98% атқарылды.
