Қазақстан мен Бразилия СІМ басшылары Рио-де-Жанейрода кездесті
Қазақстан Премьер-министрінің орынбасары – Сыртқы істер министрі Мұрат Нұртілеу Рио-де-Жанейрода өткен БРИКС елдері саммитіне қатысу барысында Бразилияның Сыртқы істер министрі Мауро Виейрамен екіжақты кездесу өткізді.
АЛМАТЫ, NEGE. Кездесуде тараптар саяси, сауда-экономикалық, инвестициялық, энергетикалық және мәдени-гуманитарлық бағыттардағы ынтымақтастық мәселелерін талқылап, халықаралық ұйымдар аясындағы өзара ықпалдастықтың келешегіне тоқталды.
Мұрат Нұртілеу Бразилияны Қазақстанның Латын Америкасындағы маңызды серіктесі әрі сенімді досы ретінде атап өтті.
— Биыл Қазақстан мен Бразилия арасындағы дипломатиялық қатынастардың орнағанына 32 жыл толды. Осы жылдар ішінде саяси диалог тұрақты жолға қойылып, экономикалық байланыстар мен халықаралық алаңдардағы ынтымақтастық елеулі түрде нығайды, — деді министр.
Қос тарап жоғары деңгейдегі сапарларды жандандыру мен тұрақты диалогты сақтау арқылы екіжақты қарым-қатынасты одан әрі дамыту қажет екенін атап өтті. Осы ретте, қазақстандық тарап бразилиялық әріптесін Астанаға ресми сапармен келуге шақырды.
Экономикалық әріптестікке басымдық
Сауда-экономикалық байланыстар кездесудің негізгі назарында болды. Географиялық қашықтыққа қарамастан, Бразилия – Қазақстанның Оңтүстік Америкадағы басты серіктесі саналады. 2024 жылы өзара сауда айналымы 257 млн АҚШ долларынан асса, 2025 жылдың алғашқы тоқсанында бұл көрсеткіш 88%-ға өсіп, 104,2 млн долларға жеткен.
Министрлер ауыл шаруашылығы, өндіріс, көлік және логистика салаларындағы ықпалдастықты тереңдетуге мүдделі екенін білдірді. Қазақстан тарапы өз кезегінде тау-кен өнеркәсібі, атом энергетикасы, авиация және тыңайтқыштар өндірісі бағыттарында бірлесіп жұмыс істеуді ұсынды.
Сондай-ақ жаңартылатын энергия, цифрлық технологиялар мен инновациялық шешімдер бойынша тәжірибе және технология алмасу мәселелері қаралды.
Халықаралық ынтымақтастыққа ортақ көзқарас
Халықаралық күн тәртібіндегі мәселелерді талқылау кезінде Астана мен Бразилиа ұстанымдарының ұқсастығы және БҰҰ мен өзге де көпжақты алаңдардағы өзара қолдау ерекше атап өтілді.
Кездесу қорытындысында екі елдің сыртқы істер министрлері Қазақстан мен Бразилия арасындағы байланыстарды одан әрі нығайтуға және БРИКС пен басқа да халықаралық ұйымдар шеңберіндегі ынтымақтастықты кеңейтуге ниетті екенін растады.
