Қайта бағалау болмаса ше? Fincraft НЕГЕ тағы да шығынға батайын деп тұр?
Отандық олигарх Кеңес Рақышев Шухрат Ибрагимовке "Шұбаркөл Премиум" акционерлік қоғамындағы ортақ бизнесін тапсырып берді. Өкініштісі, өзі үміт артатын «Fincraft Group» холдингтік компаниясының жағдайы мәз болмай тұр. Биылғы жылдың 9 айында жауапкершілігі шектеулі серіктестіктің шығыны 13,5 миллиард теңгеге жетіп отыр. Ал қордаланған шығын 95 миллиард теңгеден асып кетті.
Былтыр да «Fincraft Group» шығынға батайын деп тұрған жерінен қаржылық есептілік бойынша оның инвестициялары әділ құны бойынша қайта есептеліп, нәтижесінде 37,5 миллиард таза пайда көрсеткен болатын. Ол 2003 жылғы минусты трендті өзгерткендей әсер қалдырған еді. 2023 жылы компания 50,7 миллиард теңге шығынға ұшыраған. Алайда 2025 жылы бәрі өз орнына қайта оралып, Кеңес Рақышевтың холдингі қайтадан шығынға белшесінен бататын түр байқатады.
Биыл шығын қайдан келуде? 9 айдың ішінде «Fincraft Group» табысы 19,8 миллиард теңге болды. Бұл – өте төмен көрсеткіш. Басты себеп, холдингтің негізгі активі болып табылатын «Кумколь Транс Сервис» компаниясында табыс деңгейі бойынша екі жылдан бері проблемалар байқалады. Мұнай бағасының арзандауы, «Сарыбұлақ» кен орнының табиғи сарқылуының кесірінен мұнай өндіру көлемінің күрт азаюы «Кумколь Транс Сервис» болашағын таразыға қойып отыр. Бұлай жалғаса берсе, компания ауыр дағдарысқа ұшырап, жабылып тынуы мүмкін.
Биыл «Fincraft Group» үшін табыс аз, шығын көп болып тұр. Проценттік шығындар проценттік табыстан екі есе асып кеткен. Компанияның әкімшілік шығындары 10 миллиард теңгеден асады. Демек, әкімшілік шығынның өзі табыстың жартысынан астамын жеп қойған.
Былтыр Кеңес Рақышевтың холдингі жаңа активтер портфелін қалыптастыру үшін «Beineu Petroleum» компаниясының 40% үлесін, «Tethys Petroleum» фирмасының 26,95% үлесін сатып алған болатын. Осы арқылы «Fincraft Group» қаржылық есептілігін жаңа активтерді әділ құны арқылы бағалау әдісімен жақсартып алды.
Тақырыпқа орай: МӘСІМОВТІҢ қылмыстық ісі: Бұған РАҚЫШЕВТІҢ қандай қатысы бар?
Бірақ биыл мұндай масштабтағы сатып алулар жоқ. Сондықтан аудиттелген есептілікте әділ құны бойынша қайта есептеу орын алмауы тиіс. Демек, 2025 жылдың қорытындысы бойынша Кеңес Рақышевтың басты активті тағы да шығынға батуы мүмкін.
Кеңес Хамитұлын оптимизмге жетелейтін бір ғана жаңалық бар. Финкрафттың «БТА Банк» активтерін сатуына байланысты шығындары жылдан-жылға азайып келеді. Қазір бұл шығыннан 165 миллион теңге ғана қалды.
БТА-ның тарихи проблемалары «Fincraft Group» қаржылық есептілігін жыл сайын нашарлатып, аяққа оратылған кедергі сияқты болып келген еді. Биыл немесе келесі жылы Кеңес Рақышев БТА көлеңкесінен толық құтылатын болады.
Қиындықтарды байқаған S&P былтыр жазда «Fincraft Group» ұзақ мерзімді және қысқа мерзімді кредиттік рейтингтерін «B/B» деңгейінда растағанымен, болжамын «Тұрақтыдан» «Негативке» төмендеткен еді. Кейінірек Кеңес Рақышевтың холдингі өзінің барлық кредиттік рейтингтерінен бас тартып, оларды кері қайтарып алды.
