Қайрат Сатыбалдыұлынан алынған бизнес-орталық саудаға шығарылды
Қайтарылған активтерді басқару компаниясы Қайрат Сатыбалдыұлынан алынған Kaisar Plaza бизнес-орталығын саудаға шығарды.
Астана, NEGE. Мемлекеттік мүлік тізілімінің веб-порталында жарияланған ақпаратқа сәйкес, аукционның бастапқы бағасы – 61,5 млрд теңге, сауда-саттық барысында баға көтеріледі, ал кепілдік жарна 9,2 млрд теңге көлемінде белгіленген.
Жалпы ауданы 63,9 мың шаршы метр болатын бизнес-орталық Желтоқсан және Бөгенбай батыр көшелерінің қиылысында орналасқан. Ғимарат тоғыз қабаттан тұрады, ондағы үй-жайларды 53 кәсіпкер әртүрлі мерзімге жалға алып отыр.
«Ғимараттың жалпы ауданы бойынша айырмашылықтар бар: жылжымайтын мүлікке тіркелген құқықтар және оның техникалық сипаттамалары туралы анықтамада ғимараттың ауданы 63 920 шаршы метр деп көрсетілген, ал техникалық паспорттың көшірмесінде 56 480 шаршы метр деп берілген (айырмашылық – 7 440 шаршы метр).
Бұл айырмашылық (…) жалпы ауданы 2 297 шаршы метрге тең панорамалық қабаттың іс жүзінде шатыр болып саналатынына және жалпы ауданға енгізілмегеніне, сондай-ақ өлшеу мен қайта есептеу нәтижесінде жалпы ауданның 5 143 шаршы метрге қысқаруына байланысты туындаған», – делінген лот сипаттамасында.
Аукцион 7 сәуір күні сағат 10:00-де өтеді.
