Қайрат Әділгерей күйші Құрманғазының кесенесіне барып, кешірім сұрады

Алматы, NEGE. Әлеуметтік желіде Қайрат Әділгерейдің қазақтың ұлы күйшісі Құрманғазы Сағырбайұлы жайлы айтқан пікірі қоғамда үлкен резонанс тудырған болатын. Қоғамның сынынан кейін өнер иесі көпшілікке арнайы үндеу жасап, күйші жерленген Астрахань облысына барып, оның рухына құран бағыштап, ұрпақтарынан кешірім сұрайтынын мәлімдеген еді. 

«Алматыдан ат терлетіп арнайы Астрахань облысы Алтынжар елді мекеніне келіп отырмын. Құрманғазы бабамыздың кесенесінің алдында тұрмын. Осы орайда қазақ елінен, Құрманғазы бабамыздың ұрпақтарынан кешірім сұраймын. Атамыз туралы қисынсыз сөз айтқаным үшін басымды иіп кешірім сұраймын. Құрманғазы бабамыздың басына барып, Құран бағыштап, құрбан шалып қайттық» – деді Қайрат Әділгерей.

Айта кетейік, бұған дейін тарихи тұлға, күйші Құрманғазының ұрпақтары Қайрат Әділгерейді сотқа беретіндерін мәлімдеген еді. Себебі әзілкеш бір сұхбатында Құрманғазыны «қарақшыға» теңеген еді.