Еуроодақта адам саудасына қатысты қылмыс көбейді
Еуроодақта адам саудасы деректері көбейген, деп хабарлады 24KZ.
Алматы, NEGE. 2023 жылы 11 мыңдай осындай оқиға тіркелген. Жалпы БҰҰ-ның дерегінше бүгінде әлемде 50 миллион адам құлдық қамытын киіп жүр.
Адам саудасы не киднэппинг кедей елдерде ғана емес, дамыған Еуропада да тыйылмай тұр. 2 жыл бұрын мұнда 11 мыңдай адам ұрланған. Солардың үштен екісі – әйелдер.
Мамандар: «Шындығында бұл сан әлдеқайда жоғары болуы мүмкін», – дейді. Өйткені құрбандар қылмыс туралы айтудан қорқады не қаскөйлердің кінәсін дәлелдей алмай жатады.
Конни Рийкен, Greta адам саудасына қарсы іс-қимыл жөніндегі сарапшылар тобының президенті:
- Еуроодаққа мүше елдер ұйымның адам саудасына қарсы іс-қимыл жөніндегі конвенциясын орындау бойынша айтарлықтай жетістікке қол жеткізді. Алайда қылмыстың қайта көбейіп келе жатқанын байқап отырмыз. Сондықтан азаматтарды қорғаудың одан да тиімді шараларын қолға алу керек.
Адам саудасына қатысты қылмыстардың ашылу деңгейі Люксембург, Грекия, Нидерланд, Австрия мен Швецияда жоғары. Хорватия, Литва мен Чехияда керісінше төмен. Құрбандардың шамамен жартысы жыныстық зорлық-зомбылыққа ұшырайды. Тағы 35%-і еңбек құлдығына түседі. Қаскөйлер қалғандарын қайыршылықпен айналысуға күштеп, кейбіреулерінің дене мүшелерін сатып жібереді. Кәмелетке толмағандарды сату деректері де кездеседі.
Хатун Демирер, Еуропадағы қауіпсіздік және ынтымақтастық ұйымы бас хатшысы кеңсесінің директоры:
- Балалардың көбі адам саудасымен айналысатын қаскөйлердің құрбанына айналып жатады. Олар зорлық-зомбылыққа ұшырап, ең негізгі құқықтары сақталмайды. Еуропадағы қауіпсіздік және ынтымақтастық ұйымы мүше мемлекеттерге бұл сұмдыққа жол бермеу мүмкіндіктерін ұсына алады.
Киднэппинг табыс көлемі бойынша есірткі мен қару-жарақ саудасынан кейін әлемдегі үшінші қылмыс түрі саналады. БҰҰ-ның дерегінше, қаскөйлер жыл сайын 200 миллиард доллардан аса пайда көреді екен. Әлемдегі әрбір оныншы баланың еңбегі қаналады. Оларды негізінен иіс сулар мен электрмобильдер өндірісінде жұмысқа жегеді. Сарапшылар киднэппингпен күресу үшін халық арасында ақпараттық-түсіндірме жұмыстарын жүргізуге, халықаралық ынтымақтастықты кеңейтіп, құрбандарға жан-жақты көмек көретуге шақырады.
