«Дерзкий» Pepsi. «RG Brands» НЕГЕ мемлекеттің арзан кредитіне қол салды?
Кәсіпкер Қайрат Мәжібаев иелік ететін «RG Brands» компаниялар тобы былтыр мемлекеттік «Қазақстанның Даму банкі» акционерлік қоғамынан тікелей 4,9 миллиард теңге, синдикатталған қарыз түрінде 6,8 миллиард теңге жеңілдетілген кредит алған. Несиенің жылдық проценті 7,39-7,41% аралығында болды. Бұл нарықтық ставкалардан екі есе аз.
Мемлекеттік қаржыландыру инвестиция мен айналымдағы капиталды толтыру мақсатында алынған. Компания франшизамен «Pepsi», «Mirinda», «Seven up», «Lipton» газдалған және тәтті сусындарын өндіреді. Одан бөлек, «Пиала», «Asu», «Da da», «Gracio» брендтеріне иелік етеді.
Былтыр «RG Brands» компаниялар тобының выручкасы 171 миллиард теңгеге жетті. Соның арқасында, таза пайда 14 миллиард теңгеден асты. 2023 жылы таза кіріс көлемі 2,3 миллиард теңге болғанын ескерсек, былтыр компания үшін өте табысты кезең болғанын байқаймыз.
2023 жылы да выручка 171 миллиард теңгеден кем болмаған еді. Бірақ ол кезде компания қызметінің өзіндік құны 104 миллиард теңгеден асып жығылған. Ал былтыр компания осы өзіндік құнды 8 миллиард теңгеге қысқарта алды. Онымен бірге, қаржыландыру бойынша шығындары екі есеге азайды.
Forbes ірі кәсіпкерлер рейтингінде «RG Brands» қожайыны Қайрат Мәжібаев 190 миллион долларға бағаланған дәулетімен 50-ші орынға тұрақтаған. Қазір «RG Brands» компаниялар тобының үлестірілмеген кірісі 16миллаирд теңгеден асты.
Ең ірі акционер Қайрат Мәжібаев 2022 жылдан бері «RG Brands» АҚ табысынан дивиденд алған жоқ. Былтырғы табысты да акционерлер компания еншісінде қалдыратын болып шешті.
Себебі, компанияның қарызы 40 миллиард теңгеден асып отыр. Капиталдың құрамындағы үлестірілмеген кіріс осы қарыздарға кепіл ретінде ұстауға қажет. Алдағы 5 жылда RG Brands қарыздарды қайтару үшін едәуір шығындалатын болады.
