Демократтар Трампты НЕГЕ тақтан тайдыра алмады?
АҚШ тарихындағы үшінші импичмент дауы оны ұйымдастырғандар үшін сәтсіз аяқталды. Дональд Трамптың партиясының бақылауындағы Сенат президентке тағылған айыптарды негізсіз деп тапты.
Алматы, NEGE. 48 сенатор Трамп билкті асыра пайдаланды деген айыппен келіскенімен, 52 сенатор АҚШ президентін кінәсіз деп таныды. Импичмент жариялау үшін Трамптың қарсыластары жалпы дауыстың үштен екісіне ие болуы керек еді. Сенаттағы барлық демократ пен бір республикашыл Трампқа қарсы дауыс берді, бірақ Сенаттағы республикашылдар санының көптігімен басып кетті.
Конгресс жұмысына кедергі келтірді деген айып бойынша 47 сенатор оны кінәлі деп тапты, 53 сенатор бұған қарсы дауыс берген.
Республикашылдар ішінде Трампқа қарсы дауыс берген жалғыз өкіл – сенатор Митт Ромни.Ол бірінші айып бойынша дауыс беруде демократтардың уәжімен келіскенімен, екінші айып бойынша дауыс беру кезінде өз партиясын қолдап кетті.
Дау додаға ұласады
Демократтардың президентті тағынан тайдыру әрекетінің сәтсіздікке ұшырауы Дональд Трампты ұстанған саясатының дұрыстығына деген сенімін күшейтері сөзсіз дейді америкалық сарапшылар. Заң шығарушы орган талап еткен құжаттарды көрсетуден бас тартып келген Трамп бұл үшін жаза арқаламады. Енді ол бұрын да елегісі келмейтін Конгресспен санасуды қажет деп таппауы мүмкін деген қауіп бар. Ондай жағдайда АҚШ-тың заң шығарушы органы атқарушы билікті қадағалау мүмкіндігінен айырылады. Бұл іс жүзінде демократияның үлгісін әлемге экспорттауға құмар АҚШ-тың демократиялық институтына жасалған соққының басы да болуы ғажап емес.
Дегенмен ел ішінде жүргізілген сауалнама Трампты биліктен шеттетуді америкалықтардың жартысынан көбі – 50,2%-ы қолдайтынын көрсетті. Оның ішінде импичментті сұрау салынған демократтардың 84,1%-ы, республикашылдардың 9,4%-ы және ешбір партияда жоқпын деген сайлаушылардың 42,6%-ы жақтаған.
Сәтсіздікке ұшыраған импичмент дауы биыл өтетін президент сайлауы додасына тасталған шоқ секілді. Егер демократтар сайлаушыларды импичменттің нәтижесіз аяқталғанына өздері емес, жемқор әрі билікті асыра пайдаланған президентті алып қалған республикашылдар екеніне сендіре алса, онда олар сайлауда жеңіске жетуі әбден мүмкін. Олай болмаған жағдайда, демократтар өздері ойлап тапқан импичмент саяси шоуын жүзеге асыра алмаған «саяси импотенттер» есебінде абыройдан жұрдай болады.
Трамптың да қарап қалмасы белгілі. Ол енді өзі сайлауда уәде еткен «Бірінші кезекте Америка мәселесімен» айналысып жатқанын көрсетуге жанталасады. Немесе АҚШ-тарихында жиі болғандай қоғамның назарын импичмент дауынан да маңызды оқиғаға аударуға әрекеттенуі әбден мүмкін. Кезінде Моника Левинскиймен байланысты абыройсыз дауға басы шатылған Билл Клинтонның ісі аяғында Балқан түбегін қан қасап қылған қасіретті соғысға ұласқаны есімізде.
