Бозымбаев Алғабастағы өртке байланысты комиссияның отырысын өткізді
Вице-премьер Қанат Бозымбаев Түркістан облысының Жетісай ауданы Алғабас ауылындағы жеке үйде болған өрттің себептерін тергеп-тексеру бойынша Үкіметтік комиссия мүшелеріне бірқатар тапсырма берді.
Астана, NEGE. Ауруханаға түскен үш адамның жағдайы ауыр, олар жансақтау бөлімінде жатыр. Құтқарушылар келген сәтте зардап шеккендердің бірі – 1986 жылы туған азамат үйден өз күшімен шығып үлгерген. Оның жағдайы ауыр, денесінің 12%-ын күйік шалған.
Тағы екі зардап шегуші – 1991 және 2018 жылы туған азаматтар да денесінің 30% және 11% күйігімен шұғыл түрде ауруханаға жеткізілді, қазір олар өкпені жасанды желдету аппаратына қосылған. Жедел медициналық көмек көрсету үшін Шымкенттен санитарлық авиация бригадасы ұшып шықты.
Өрттің себебі анықталып жатыр. ҚК 292-бабының 3-бөлігі бойынша сотқа дейінгі тергеу жүргізілуде.
Вице-премьер әкімдікке және Еңбек және халықты әлеуметтік қорғау министрлігіне қаза тапқандардың отбасыларына қажетті материалдық көмекті толық көлемде көрсетуді тапсырды. Денсаулық сақтау министрлігіне зардап шеккендердің жағдайын тұрақты бақылауда ұстау, қажет болған жағдайда санитарлық авиацияны пайдалана отырып, оларды Астана қаласына жеткізуді ұйымдастыру жүктелді, – делінген Үкімет хабарламасында.
Төтенше жағдайлар министрлігіне өңірлердің әкімдіктерімен бірлесіп, тұрғын үйлер, әсіресе халықтың әлеуметтік осал топтарына жататын отбасылардың үйлеріне, жатақханалар мен хостелдерге рейд жүргізу туралы тапсырма берілді.
Рейд барысында пеш жүйелерінің жағдайы тексеріліп, ақаулар анықталса, оларды жедел түрде жою қажеттігі айтылған.
Айта кетейік, 18 қараша күні Жетісай ауданының Алғабас ауылында болған өрт салдарынан 12 адам қаза тапты.
