Түркістан облысында алапат өрттен 12 адам қаза тапты
Түркістан облысында алапат өрттен 12 адамның денесі табылды. Олардың ішінде балалар да бар.
Астана, NEGE. Түркістан облысы ТЖД «101» пультіне Жетісай ауданының Алғабас ауылында орналасқан екі қабатты жеке тұрғын үйдің өртенгені туралы хабарлама түскен.
Оқиға орнына өрт сөндіру бөлімі келген кезде үй толықтай өртке оранған.
Өртті барлау және сөндіру барысында үйдің ішінен ес-түссіз күйдегі үш адам эвакуацияланып, жедел медициналық жәрдем бригадасына тапсырылды. Үйдің ішінен тоғыз баланы қоса алғанда, барлығы 12 адамның денесі табылды, – делінген хабарламада.
Көршілердің айтуынша, алдыңғы күні үй иелері іс-шара өткізіп, үйде қонақтар болған.
Өрт толықтай сөндірілді. Оқиға орнында барлық жедел қызметтер жұмыс істеп жатыр. Тергеу басталды, өрттің шығу себептері анықталуда.
Президент Қасым-Жомарт Тоқаев адамдардың өліміне байланысты көңіл айтты. Мемлекет басшысы Үкімет пен Түркістан облысының әкіміне зардап шеккен азаматтардың туған-туыстарына барлық қажетті көмек көрсетіп, қайғылы оқиғаны жан-жақты тексеруді тапсырды.