Алтын падишахы. Шахмұрат Мүтәліп НЕГЕ Қазақстан алтынын жинай бастады?
«Жаңа Қазақстанның» су жаңа олигархы, кәсіпкер Шахмұрат Мүтәліп биылдан қалдырмай Швейцарияның Glencore алпауытынан «Казцинк» өндірістік тобының 69,74 пайыз үлесін сатып алуы тиіс. Nege.kz дереккөзі Казцинктің жалпы құны 6 миллиард долларға бағаланғанын айтады. Онда Мүтәліп сатып алатын Glencore үлесінің бағасы 4,18 миллиард доллардың шамасында болатынын болжай аламыз.
Бұл есеп Bloomberg инсайдымен де үндес келеді. Оның алдында Bloomberg швейцариялық компанияның Казцинктегі үлесті Шахмұрат Мүтәліпке 4-4,5 миллиард долларға сататыны туралы жазған болатын. Бірақ мұндай дайын қаржы қазақстандық кәсіпкердің қолында жоқ екені түсінікті. Сондықтан Bloomberg бұл ірі мәмілені Glencore мен Mercuria қаржыландырады деген пікірде. Бір сөзбен айтқанда, Мүтәліп Казцинктегі басқарушы үлесті Glencore-дан бөліп төлеу әдісімен сатып алады да, біртіндеп қарызын жауып отырады.
«Казцинк» тобының 29,82 пайыз үлесін «Тау-Кен Самұрық» ұлттық компаниясы арқылы мемлекет иеленіп отыр. Мемлекеттің бұл үлесті сатпайтыны анық. Казцинк бұған дейін жекешелендірілген актив деп саналатындықтан, аталған үлес жекешелендірудің кешенді бағдарламасына енгізілмеді. Сондықтан болашақта Шахмұрат Мүтәліптің Казцинк бойынша екінші серіктес акционері мемлекет болады.
Казцинкке қатысты мәлімет нақтыланған кезде, Шахмұрат Мүтәліптің еліміздегі ірі алтын өндіруші компанияның бірі – «АК Алтыналмас» акционерлік қоғамына қызығып отырғаны туралы инсайдтар пайда бола бастады. Nege.kz дереккөзі оның логикаға сай келетінін растайды. Егер Казцинк пен Алтыналмасты біріктіре алса, онда Мүтәліп Қазақстандағы №1 алтын гигантын жасап шығармақ.
Қазір Казцинк жылына 18 тонна, Алтыналмас 15 тонна алтын өндіреді. Олардың негізгі бәсекелесі – Solidcore Resources жылына орташа есеппен 16 тонна алтын шығарады. Казцинк пен Алтыналмас қосылса, жылына 33 тонна алтын өндірісі межесіне шығып, Қазақстанның ең ірі алтын компаниясы аталары сөзсіз. Және Шахмұрат Мүтәліп автоматты түрде Орталық Азияның алтын короліне айналады.
Бірақ ол үшін алдымен «АК Алтыналмас» акционерлік қоғамын акционерлері – Gouden Reserves B.V. трасты (66.82%) мен Владимир Жұманбаевтан (22,78%) сатып алу керек. «Алтыналмас» компаниясы 2025 жылдың қаржылық нәтижелерін жариялаған жоқ. Бірақ оның 9 айдағы көрсеткіштеріне қарап, алтын өндірушінің 2025 жылғы таза кірісі кемінде 320 миллиард теңге болғанын сезіп отырмыз.
«АК Алтыналмас» АҚ капиталы 2025 жылы 560 миллиард теңгеден асып тұрды. Оған кен орындарындағы руда резервін, алтын бағасының өсу перспективасын, тұрақты ақша ағынын қосып капитализацияласақ, нарықтық құны кемінде 3 миллиард долларға баратынын шамалауға болады.
Нидерландылық Gouden Reserves B.V. трастының артында Владимир Ким тұрғаны жасырын емес. Ол жақында ғана «Қазақмыс» тобын Нұрлан Артықбаевқа сатты.
Кимнің қазақстандық активтерден шығу стратегиясының аясында Алтыналмасты алдағы екі-үш жыл уақыт ішінде сату мүмкіндігі расымен де логикаға сай келеді.
Владимир Ким бұл мәміледе бағаны қатты көтермей, «Алтыналмас» үшін дисконт жасауы ықтимал. Себебі «Жаңа Қазақстанның» оған әсер ете алатын бірнеше компроматы бар.
