Алматы облысында алдағы 4 жылда 115 мектеп салынады
Орталық коммуникациялар қызметі алаңына еліміздің облыс әкімдері мен үш мегаполистің әкімдері келіп, өңірдегі 9 айда атқарылған жұмыстары жөнінде есеп беріп жатыр.
Алматы, NEGE. Күні кеше Алматы облысы әкімі Амандық Баталова орталыққа атбасын бұрын, өңірдің әлеуметтік-экономикалық дамуы туралы баяндап берді.
Орталық коммуникациялар қызметіне келген әкімдер Тәуелсіздіктің 30 жылдығында облыстың жеткен жетістігін айрықша назар аударып жатыр. Амандық Ғаббасұлы да әкімдердің әдетін жалғастырып, Алматы облысының Тәуелсіздік жылдары қол жеткізген жетістіктері туралы баяндады.
«Биыл барша қазақстандықтар үшін айрықша жыл еліміздің Тәуелсіздігіне 30 жыл толады. Осы күнге Алматы облысы жақсы нәтижелермен жетті. Мәселен, жалпы өңірлік өнім көлемі 35 млн теңгеден 3,7 трлн теңгеге дейін ұлғайды. Өнеркәсіп өнімін шығару 9,5 млн теңгеден 1 трлн 200 млрд теңгеге дейін өсті, ал ауыл шаруашылығының жалпы өнімі биыл 1 трлн теңгеден асады. Соңғы 30 жыл ішінде 14,5 млн шаршы метр тұрғын үй пайдалануға берілді. Бюджетке түсімдер 1997 жылғы 11 млрд теңгеден 742 млрд теңгеге дейін өсті. 30 жылда облыс экономикасына 6,5 трлн теңге инвестиция салынды. Сонымен қатар биылғы 10 айдың қорытындысы бойынша экономиканың барлық саласында тұрақты өсім байқалды», – деді ол.
Амандық Ғаббасұлының айтуынша, жыл соңына қарай өнеркәсіп өнімінің көлемі 1 трлн 300 млрд теңгеден асады. Сондай-ақ ол шикізаттық емес экспорт 6 пайызға өсіп, 392 млн АҚШ долларына жететінін тілге тиек етті.
Бұдан бөлек аймақ басшысы өңірдегі өнеркәсіптерге тоқталып, ауыл тұрғындарының табысын арттыру және азық-түлік қауіпсіздігін қамтамасыз ету мақсатында агроөнеркәсіптік кешенді дамыту бойынша шаралар қабылданып жатқанын жеткізді.
Мәселен, ағымдағы жылы мемлекеттік қолдауға 50 млрд.теңгеден астам қаражат бөлінген, оның ішінде, 43 млрд.теңге субсидия есебінен болған.
«Облыста ауылшаруашылығы дақылдары алқабы 972 мың гектарға жеткізілді, оның ішінде қант қызылшасы – 16 мың, жүгері – 95 мың, картоп – 40 мың гектардан асты. Біз 2025 жылға дейін қант қызылшасы алқабын 53 мың гектарға дейін ұлғайту есебінен өндіріс көлемін екі миллион тоннаға дейін жеткізу жөнінде ауқымды міндет қойып отырмыз. Ол үшін жалпы өңдеу қуаты жылына 1 млн.100 мың тоннаға дейін баратын Көксу және Ақсу қант зауыттарын жаңғырту жоспарлануда, - деді Амандық Баталов.
Сондай-ақ, 2030 жылға қарай суармалы жер көлемін 3 миллион гектарға дейін ұлғайту туралы Елбасы мен Президент Жолдауындағы тапсырмалары аясында облыста 138 мың гектарды қалпына келтіру жоспарлануда.
Соңғы үш жылда айналымға 39 мың гектар бұрын шығып қалған суармалы жер тартылды. Ағымдағы жылы 14 мың гектарды қалпына келтіру үшін 6,3 млрд.теңгеге ирригациялық құрылыстарға күрделі жөндеу жүргізілуде. Ислам даму банкі есебінен Ескелді және Ақсу аудандарында суару желілерін қайта жаңарту жалғасуда.
Өткен жылмен салыстырғанда мал мен құс саны орта есеппен 2 процентке өсті. Мал қыстауы үшін облыс жем-шөппен толық қамтамасыз етіліп, 5,3 млн.тонна азық дайындалды. Маңғыстау облысының зардап шеккен фермерлеріне гуманитарлық көмек ретінде 54 вагон шөп жіберілді.
Барлығы 117 мал бордақылау алаңы (74,1 мың бас) және 84 сүт-тауар фермасы (26,1 мың бас) жұмыс істейді, соның есебінен ет өңдеу кәсіпорындарының жүктемесі 72%-ке, сүт зауыттары – 85%-ке жетті.
Агроөнеркәсіп кешенінің қайта өңделген өнімдерінің экспорты 25% өсіп, 97 млн. АҚШ долларын немесе жалпы агроөнеркәсіп кешені экспортының 73%-тін құрады. Жыл соңына қарай ауыл шаруашылығының жалпы өнім көлемі алғаш рет бір триллион теңгеден асады.
Осындай жетістіктерді баяндап шыққан облыс әкімі кәсіпкерлік, бағаны тұрақтандыру, қымбатшылықтың алдын алу тақырыптарында да сөз қозғады. Сонымен бірге, шағын және орта бизнесті қолдау шаралары, жұмыспен қамту, тұрғын үй құрылысы, су жүйесі, жылу қазандықтары, автомобиль жолдары бойынша атқарылған жұмыс нәтижелері айтылды.
«Экономикадағы тұрақты өсу, инфрақұрылымдық жобаларды іске асыру және қабылданған әлеуметтік қолдау шаралары халықтың табыс деңгейін сақтауға, жұмыссыздықтың өсуіне жол бермеуге (4,8%) мүмкіндік берді. «Еңбек» бағдарламасы бойынша ағымдағы жылы 60 мың жұмыссыз және өзін-өзі жұмыспен қамтыған азаматтар қамтылды. Әлеуметтік көмекті жалпы сомасы 10,3 млрд.теңгеге 251 мың адам алды», - деді Алматы облысының әкімі.
Алматы облысында мектеп үш ауысымды және апатты жағдайдағы мектептер баршылық. Мұны облыс әкімі өңірдегі демографиялық жағдаймен байланыстырады. Сонымен қатар әкім апаттық жағдайдағы мектептердің санын азайту үшін алдағы жылдары 115 мектеп салынатынын тілге тиек етті.
«Nur Otan» партиясының сайлауалды бағдарламасы аясында үш ауысымдағы оқыту проблемасын шешу үшін 2021-2025 жылдары 115 мектеп салуымыз керек. Биыл жоспарланған 17 мектептің 5400 орынға арналған 12-сі пайдалануға берілді. Оның ішінде алтысы жеке мектеп. Жыл соңына дейін қалған бесеуі тапсырылады. Сондай-ақ 137 мектепке қатысты жаңғырту жұмыстары жүріп жатыр, бұл жұмыстарға 11,3 млрд теңге қарастырылған. Жыл басынан бері 9590 орынға арналған 135 балабақша ашылды, - деді әкім.
Халықтың ең басты проблемасының бірі баспана екені көпшілікке белілі. Бұл бағытта Алматы облысында ауқымды жұмыстар атқарылып жатыр. Мысалы «Нұрлы жер» бағдарламасы аясында аймақта 835 мың шаршы метр баспана пайдалануға берілген.
«Құрылыс саласында «Нұрлы жер» бағдарламасы бойынша биыл 1 млн шаршы метр тұрғын үйді пайдалануға беру жоспарланған. Оның ішінде қазіргі кезде 835 мың шаршы метр пайдалануға берілді. 1 824 пәтері бар 271 тұрғын үй салынып жатыр. Соның арасында 741 пәтерлік 121-і тапсырылды. Сондай-ақ жеке құрылысшылар 952 пәтерлік 13 үйді пайдалануға берді. Бүгінде 1 307 отбасы пәтерін алды, оның ішінде 327-сі көпбалалы отбасы мен әлеуметтік тұрғыда әлсіз топтардан», - деді әкім.
