Алматыда сот Қожамжаровтың бауырына тиесілі мүлікке тыйым салды
17 қараша күні Алматы қаласының Медеу аудандық соты Қазақстан Халық банкінің талап-арызы бойынша бұрынғы бас прокурор Қайрат Қожамжаровтың бауыры Дулат Қожамжаровтың мүлкіне тыйым салды.
Астана, NEGE. Сот анықтамасында жауапкерлер Қожамжаров Дулат Пернешұлы мен Қожамжарова Гүлназ Сағатбекқызыға, сондай-ақ «Oйл Снаб» компаниялар тобы» ЖШС, «HILL Resources» ЖШС, «HILL Invest» ЖШС, «AvtoTechMas Ltd» ЖШС-на тиесілі жылжымалы және жылжымайтын мүлікке 2 627 160 208 теңге көлемінде тыйым салынатыны көрсетілген.
Бұған дейін Forbes Kazakhstan Дулат Қожамжаровтың байлығын 110 млн долларға бағалап, оны елдегі ең бай бизнесмендер тізімінде 57-орынға жайғастырған еді.
Сондай-ақ Бас прокуратураның активтерді қайтару жөніндегі комитеті Дулат Қожамжаровты «Заңсыз иемденілген активтерді мемлекетке қайтару туралы» заң аясындағы арнайы тізілімге енгізген.
- Тақырыпқа орай: Қайрат Қожамжаровқа қатысты қылмыстық іс бойынша тергеу басталды