Жұманғарин халықтың табысы өте баяу өсіп жатқанын айтты

Астана, NEGE. Taldau Talks подкастында ол халықтың кірісі «төмендемейді, бірақ тиісті деңгейде өспейді де» деп мәлімдеді.

Министрдің айтуынша, 2025 жылдың қаңтар - наурыз айларында номиналды жалақы жылдық есепте 10,7%-ға өссе де, жоғары инфляция бұл өсімді шамамен жоққа шығарған. Нәтижесінде нақты жалақы тек бірінші тоқсанда 1,2%-ға ғана артқан.

«2015-2017 жылдары халықтың жалақысы теріс өсім көрсеткен. 2019-2022 жылдары шамамен 8%-дық өсім болды, ал 2023-2024 жылдары - 2,5%, яғни жақсы кезеңдер де болған», – деді Жұманғарин.

Сонымен бірге, ол жалақының алдыңғы кезеңдердегі өсуі әлеуметтік салаға бағытталған ірі қаржылық салымдардың арқасында болғанын айтты.