«Жұлдыз лига» жеңімпаздары анықталды
Шағын футболдан өнер және медиа қызметкерлердің арасындағы «Жұлдыз лига» қалалық біріншілігінің жеңімпаздары анықталды, деп хабарлады BAQ.KZ тілшісі.
Алматы, NEGE. Жарысқа барлығы 12 команда қатысқан. Одан 6 команда іріктеліп, чемпиондыққа таласты.
Ұйымдастырушы Нұрсұлтан Құрман кәсіби футзалшылармен ойында тереземіз тең емес, әуесқой футболшылармен көп жігіттердің ойнауы қиын дегенді айтып, басты мақсат футболды жақсы көретін өнер ұжымдары мен медиа қызметкерлеріне арнайы алаң жасау екенін жеткізді.
Жарыста Қазмедиа орталығының жігіттерінен құралған «Voltman» командасы жеңімпаз атанып, 1 миллион теңге жүлде қорына ие болды. Екінші орынды Қарағанды қаласының өнерпаздарынан құралған «Никулин» командасы жеңіп алса, қола жүлдені «Qurman» командасы қанжығасына байлады.
Алдағы уақытта «Жұлдыз лиганың» қысқы маусымы басталады. Оған Астанадағы телеарна, театр, өнер ұжымдары, блогерлер мен той саласында жүрген азаматтардан құралған 10-14 команда қатысады деп күтіледі.
