Жолшы болғысы келетін жастармен кездесу өтті

Алматы, NEGE. Сол себепті Жол активтерінің ұлттық сапа орталығы мақсатты түрде жастарды болашақта жол саласында еңбек етуге шақырып, осы саланың озық тәжірибелі мамандары болуы үшін оларға талмай насихат жүргізуде. 

Мемлекеттік мекеменің Алматы филиалында өнімді еңбек етіп жүрген инженерлері қаладағы мектептер мен оқу орындарын аралап кәсіптік бағдар берудің ерекше әдісін қолға алған. Филиал қызметкерлері Алматы автомобиль жол колледжінің студенттерімен оқу орны ауласында кездесу өткізді. Кәсіптік бағдар берудің мұндай әдісі – жол саласының болашақ мамандарына да өте қызықты болды.

Жүздесудің басты ерекшелігі – филиал мамандары студенттермен кездесуге жылжымалы зертхана көлігімен келді. Жылжымалы кешенде жол сапасын анықтайтын, түрлі сынамалар алатын, өлшем жұмыстарын жүргізетін барлық мүмкіндік бар.

Жол активтерінің ұлттық сапа орталығы Алматы филиалының тәжірибелі қызметкері, инженер Айдар Бейісбеков студенттерге жылжымалы жол зертханасының жұмыс істеу принциптерін, ерекшелігін, өзге зертханалардан артықшылықтарын мұқият таныстырды. Одан бөлек, жол белгілерінің стандартқа сай болуын, жол бойындағы сызықтардың талапқа сай болуын тексеретін озық үлгідегі құралдар да студенттерге таныстырылды. Құралдарды көзбен көріп, қолмен ұстап көрген шәкірттердің жол мамандығына қызығушылықтары одан сайын артары сөзсіз.

Ал жолшы болуды мақсат еткен студенттер ұлттық орталықта жаз мезгілінде ақылы түрде оқу тәжірибесінен өте алады. Ол кезде де студенттер филиал жұмысына тікелей араласып, жол сапасын тексеруге үлес қосады. Сонымен қатар, мол тәжірибе жинайды.