Жыл соңына дейін 294 отбасы жалдамалы баспанамен қамтылады
Бүгін Шымкент қаласы тұрғын үй басқармасының басшысы Азамат Рысжанов @akimat_shymkent инстаграм парақшасында тікелей эфирде тұрғындармен жүздесіп, тұрғын үй кезегі, оның жылжуы тұрғысында қойылған сұрақтарға жауап берді.
Шымкент, NEGE. Тұрғын үйге мұқтаж азаматтар кезегінде тұрғандарға мемлекеттік тұрғын үй қорынан жалдамалы пәтер белгіленген тәртіппен кезек ретімен берілетінін және кезек реттілігі толығымен автоматтандырылғанын айтты.
- Шымкент қаласы республика бойынша тұрғын үй құрылысы қарқынды жүріп жатқан аймақтар қатарында. Биыл 976 отбасыны арендалық пәтермен қамту жоспарланған. 300 пәтер жыл басында жұмыс істейтін жастарға, 382 пәтер кезек ретімен берілді. Жыл соңына дейін қалған 294 отбасы жалдамалы баспанаға қол жеткізеді,- деді А.Рысжанов.
Тұрғын үй кезегіндегілер үшін «Шаңырақ» бағдарламасымен 1728 пәтерлі 27 көп қабатты тұрғын үй кезең-кезеңімен берілуде. Бүгінде 17 үйдің инфрақұрылымдық коммуналдық қызметтері іске қосылып пәтер иелеріне кілттері берілді.
Басқарма басшысы эфир кезінде тұрғындардан түскен отыздан аса сұраққа жауап берді.
