Жетісуда еңбек өтілі 20 жылдан асатын шенеунік құмар ойын үшін жұмыстан босатылды
Жетісу облысында екі лауазымды тұлға сыбайлас жемқорлыққа қарсы заңнама талаптарын сақтамағаны үшін қызметінен босатылды. Олардың бірі – еңбек өтілі 20 жылдан асатын аудандық бөлімше бастығы.
Астана, NEGE. Бұл жөнінде облыстық прокуратура хабарлады. Прокурорлардың мәлімдеуінше, шенеуніктер букмекерлік кеңсенің мобильді қосымшасы арқылы жүйелі түрде бәс тігіп келген. Ойын шотын толықтырудың жалпы сомасы 7,7 млн теңгеден асқан.
«Енгізілген прокурорлық ден қою актісін қарау нәтижесінде тәртіптік комиссияның шешімімен екі лауазымды тұлға атқарып отырған лауазымдарынан босатылды», – делінген хабарламада.
Қадағалаушы орган өкілдерінің түсіндіруінше, лауазымды тұлғалардың мұндай әрекеттері мемлекеттік қызметтің абыройы мен беделіне нұқсан келтіріп, сыбайлас жемқорлық тәуекелдерінің артуына әкеледі.