Жеке сот орындаушылар аккредитациядан өтуге міндеттеледі
Парламент жеке сот орындаушыларды аккредитациядан өтуге міндеттейтін заң жобасын қарап жатыр. Бұл туралы Премьер-министр Олжас Бектенов Сенат депутатының сауалына жолдаған жауапта айтқан.
Алматы, NEGE. «Әділет министрлігі Парламент депутаттарымен бірге атқарушылық іс жүргізу механизмдерін жетілдіруге, сондай-ақ жеке сот орындаушыларының заңсыз әрекеттері үшін жауапкершілігін күшейтуге бағытталған заңнамалық түзетулер әзірледі. Атап айтқанда, ұсынылып отырған заңнамалық өзгерістер жеке сот орындаушысы қызметімен айналысуға лицензия алуға қойылатын талаптарды қатаңдатуды, оқудан (біліктілігін арттырудан) өту мерзімдерінің кезеңділігін (3 жылдан 2 жылға дейін) қысқартуды, жұмыс істеп жүрген жеке сот орындаушыларын міндетті аттестаттауды енгізуді, қызметтік өкілеттіктерін теріс пайдаланғаны үшін қатаң санкциялар белгілеуді, тәртіптік жазаны мерзімінен бұрын (6 айға дейін) алып тастауды жоққа шығаруды, әкімшілік шараларды қолдануды, сот орындаушысының іс-әрекетінің ашықтығын қамтамасыз етуді көздейді», — деп жазады Олжас Бектенов.
Сондай-ақ, Премьер-министр жеке сот орындаушылардың заң бұзу фактілері бар екенін мойындаған.
«Осыған байланысты Әділет министрлігі Бас прокуратурасының ұсынуы бойынша жеке сот орындаушыларына қатысты шаралар қабылдады (кінәлі тұлғалар тәртіптік жауапкершілікке тартылды және лицензиялардан айрылды). Көрсетілген шаралармен қатар заңдылықты сақтау мен уақтылы шаралар қабылдау тұрғысынан жеке сот орындаушыларының қызметіне үнемі қашықтан мониторинг жүргізіледі», — делінген жауапта.
