Жеке деректерін қорғау әр азаматтың міндеті – ІІМ
Жеке деректерді қорғау тек мемлекеттік органдар мен компанияларға емес, азаматтардың өзіне байланысты. Бұл ҚР ІІМ Киберқылмысқа қарсы іс-қимыл департаментінің бастығы Жандос Сүйінбай айтты.
Астана, NEGE. Оның сөзінше, жеке деректерді қорғау мәселесіне әрбір ұйым үлкен жауапкершілікпен қарауы тиіс.
«Интернет заманында әр азамат өзінің жеке деректерін қорғауға міндетті. Өз мәліметтерін түрлі сайттарға жариялаудан сақтану керек. Мемлекеттік орган болсын, жеке ұйым немесе компания болсын, жеке деректерді сақтауға және қорғауға жауапкершілікпен қарауы қажет», – деді департамент басшысы Құрылтай брифингінде.
Оның айтуынша, киберқауіпсіздік бағытында мемлекеттік органдар арасында бірлескен жұмыс жүргізіліп жатыр. Бұл ретте интернет мониторингі арқылы анықталған фактілер бойынша қылмыстық істер де қозғалған.
Тілшіміз жеке деректермен жұмыс істейтін компанияларға қойылатын талаптарды күшейту мәселесін де көтерді. Дегенмен департамент басшысы жеке деректермен тығыз жұмыс істейтін компанияларға қатысты талаптар қашан және қалай күшейтілетіні туралы сұрағымызға нақты жауап бермеді.
Айта кетейік, бұған дейін Daryn.online білім беру платформасында 4,2 млн пайдаланушының жеке деректері тарағаны туралы ақпарат тараған болатын. Тексеру нәтижесінде бұл факт расталмаған. Алайда компания жеке деректерді қорғау бойынша міндетті шараларды тиісінше орындамағаны үшін әкімшілік жауапкершілікке тартылды.