Жайлы мектептің ерекшелігі қандай? – Министр жауап берді

Алматы, NEGE. – Жайлы мектептердің басты артықшылығы – онда оқушыларға қолайлы, эргономикалық білім беру кеңістігінің жасалуы. Бұл мектептердің көлемі типтік жобаларға қарағанда 15-20%-ға үлкен, ал техникалық жарақтануы жағынан 4 есеге артық, - деді министр ОҚК алаңында.

Ол жайлы мектептердің жартысына жуығы ауылдық елді мекендерде салынып жатқанын айтты. Оқу-ағарту министрінің мәліметінше, 200 мыңнан астам ауыл баласын заман талабына сай жайлы білім беру ортасымен қамтамасыз ету жоспарланған.

Сондай-ақ Ғани Бейсембаев барлық жайлы мектептер заманауи жиһаздармен және оқу құрал-жабдықтарымен жабдықталып, әрбір оқу кабинеті үшін қажетті техникалық құралдар жиынтығы қамтамасыз етілгенін атап өтті.

– Мектептерде робототехника кабинеттері, STEM-зертханалар, хореография залдары, коворкинг аймақтары, 4 спорт залы бар, заманауи пәндік кабинеттер, алғашқы әскери дайындық үшін арнайы ашық алаңдар қарастырылған, - деді министр.

Ғани Бейсембаев қауіпсіздік режимі күшейтілгенін жеткізді.

– Ұлттық жоба аясында салынған мектептерде қауіпсіздік жүйелері күшейтілген. Мектептер заманауи бейнебақылау және ғимаратқа кіріп-шыққандарды қадағалау жүйелерімен қамтамасыз етілген. Бастауыш және жоғары сыныптар бөлек-бөлек блоктарда оқиды. Мұның барлығы баланың қауіпсіз әрі жайлы ортада білім алуына бағытталған, - деді ол.

Оқу-ағарту министрі жобаның негізгі басымдықтарының бірі оқушыларға ерте жастан кәсіби бағдар беру екенін атады.

– Оқушыларды еңбекке баулу және шығармашылық әлеуетін дамыту мақсатында мектептерде әмбебап шеберханалар мен студиялар, сондай-ақ бастапқы кәсіби білім беруге арналған арнайы жабдықталған кабинеттер қарастырылған. Атап айтқанда, тігін, аспаздық, ақпараттық технология, ағаш шеберханасы және басқа да бағыттар бойынша оқу бөлмелері қажетті заманауи жабдықтармен толық қамтылған, - деді Ғани Бектаев.

Сонымен қатар, жоба аясында барлық мектептерде интернет желісіне кемінде 100 Мегабит жылдамдықпен қосылу мүмкіндігі қамтамасыз етілетін болады.