Жайлы мектеп пен Келешек мектептерінің айырмашылығы неде?
Алматы, NEGE. 2022 жылы Мемлекет басшысы Қазақстан халқына Жолдауында “Жайлы мектеп” ұлттық жобасын жүзеге асыруды тапсырды. Былтыр ауқымды құрылыс жұмысы басталды. Бүгінге дейін 105 мектеп салынды. Биыл тағы 112 мектептің құрылысы аяқталып, іске қосылатыны белгілі. Алайда министр баяндамасында “Келешек мектептері” деген тіркесті қолданады.
– Біз мектептің құрылысын бастаған кезде ең басты мақсат 3 ауысымдық пен апатты жағдайдағы мектептердің мәселесін шешу идеясы шеңберінде басталды. Сондықтан бұл құрылыс жобасы ретінде “Жайлы мектеп” болып аталған болатын. Енді біз жайлы ортаны қалыптастырдық. Сондықтан “Жайлы мектеп” идеясынан “Келешек мектептері” идеясына көшуді жоспарлап отырмыз, – деді Ғани Бейсембаев.
Министр “Келешек мектептері” идеясын да түсіндіріп өтті.
– Енді біз тек бұл 217 мектепті емес, қалған мектептерді де келешектің мектебі ету бағытында, осы идеологема шеңберінде бүгіннен бастап барлық мектептерге үлгі болатын және содан үйреніп, сол деңгейге жетуге серпіліс беретін мектептер қауымдастығын құру бағытындағы мектептерді “Келешек мектептері” деп атауды жоспарлап отырмыз. Яғни болашақта тек 217 емес, қалған 8 мың мектебімізді де келешек мектептеріне айналдыру жоспарланып отыр деген сөз, – деді ол.
